E fondonan di pensioen mester keda busca forma simpel pa comunica cu nan clientenan, esta e trahadonan cu ta spaar pa nan pensioen y tambe esnan cu ta cobra pensioen caba, pa involucra nan mas tanto cu e topiconan relaciona cu pensioen.
Esaki tabata e liña cora durante di e di tres seminario di e Asociacion di Fondo di Pensioen di Caribe, CaPAs cu a tuma luga recientemente den Cinemark na Sambil. A enfatisa, cu keda sin comunica por resulta den un riesgo adicional.
E fondonan di pensioen ta meymey di comunidad tambe na momento di calamidad, asina sra. Evelyn Kruithof-Bor, directora di e Fondo di Pensioen General (APC) y alabes presidente di CaPAs, a duna di conoce. E presidente di CaPAs a mustra su respet y aprecio pa e trahadonan di e Fondo di Pensioen di Sint Maarten cu apesar di nan situacion personal y e daño cu nan a sufri na entre otro nan cas den horcan Irma, toch nan a traha duro y percura pa e pagonan di pensioen tuma luga na ordo.
Tema di e di tres seminario di CaPAs tabata ‘Comunicacion y Participacion’. Comunicacion ta un tema cu nos tur sa di dje. Con cu bay bin nos tur ta comunica cu otro henter dia. Pero dicon ta parse asina dificil pa logra interesa nos participantenan den nan pensioen? Acaso e materia ta asina dificil of tin otro factornan ta hunga un rol? E oradonan señor Steve Schuit y señor Guus Wouters ta comparti nan conocemento y ideanan riba e tema, asina sra. Kruithof-Bor a sigui splica.
Señor Steven Schuit ta profesor Corporate Governance and Responsibility na Nyenrode Business University na Hulanda. E ta un profesor emerito na Universidad di Utrecht ley internacional y comercial. E tin hopi aña di experiencia den sector priva como gerente y comisario.
Señor Guus Wouters ta un persona cu a dedica henter su trayecto laboral den e area di seguridad social y a traha den sector di pensioen. El a ocupa varios funcion como gerente den diferente organisacion manera Pensioenfonds Metaal en Techniek. PMT cu un capital di 70 miljard euro y 1.3 miyon di participante, ta un di e fondonan di pensioen di mas grandi na Hulanda.
No por forsa
Tin un dicho na Hulandes cu ta bisa cu bo por hiba cabay te na boca di pos, pero bo no por obligue bebe.
Profesor Schuit a haci un comparacion entre e dicho bieu aki y comunicacion den 2018. “Bo no por exigi comunicacion, pero si bo por promove”, segun señor Schuit. Bon comunicacion ta un habilidad, mester tin empatia, conocemento propio, pasenshi y experiencia. Den esaki por topa cu frustracion ora cu no ta haya oido apesar di a comunica e informacion hopi biaha caba. Den comunicacion esun cu ta scucha mester kier ricibi e informacion y tambe e mester por compronde loke ta comunidad cu ne. Segun Schuit, comunicacion efectivo ta sosode di curason pa curason.
Señor Guus Wouters a presenta un inventarisacion di posibel opcion como solucion pa e fondonan di pensioen. Mas uzo di comunicacion digital y simplificacion di comunicacion pa logra mas comprendemento di e materia.
