E pregunta ta cu si den nos sistema legal ta posibel pa trahadornan cu sindicato exigi cabez di un director di e empresa?
Tur hende por yena nan peticion, pero si bo puntra mediador, den experiencia sindical, esey no ta e caminda pa resolve e situacion. Mañan bo haya un otro director cu ta haya e mesun instruccion. No mester lubida cu un director di un NV di gobierno, ta haya instruccion di su dunado di trabao. Den e caso aki hunta di comisario, den e caso aki Utilities, tin un tarea pa cumpli cun’e. Partidonan por tin diferencia di opinion na mesa. Pero cualkier director, sea Elmar, WEB, Aeropuerto y tur e empresanan estatal, nan tin cu tene cuenta cu e instruccionnan cu nan ta haya di nan hunto di comisario y pa e rason ey tambe, mediador di gobierno a invita tanto gerencia di Elmar, e hunta di comisario of por lo menos representante di hunta di comisario, presidente di hunta di comisario di Elmar y tambe a invita director di Utilities NV pa combersa riba e situacion cu a surgi aki, realmente pa splica kico a tuma luga na momento cu e partidonan a acerca mediador di gobierno desde October di aña pasa.
Solucion
Segun Pontilius, por yega na un solucion. Pa prome biaha nan lo bay negosha un contracto colectivo pa staff. Eyden tin condicionnan di trabao ya existente cu ta aplicabel y e puntonan mester keda riba e parti financiero y tambe e garantia cu e sindicato ta exigi den e proceso di reorganisacion di e compania. Ta normal cu por tin duda, si awe ta den funcion A, ken ta garantisa den e reorganisacion, con e funcion lo ta den e empresa reorganisa.
