Dialuna 14 di Mei den oranan di mainta a drenta e tristo noticia cu un deportista grandi y alaves un gran persona un tata y abuelo ehemplar Sr. Efigenio Croes mihor conosi como “Efi Boxdo” of tambe “Papa Bieuw” a bay sosega na edad di 84 aña.
Mientras cu esaki a causa hopi tristesa den seno familiar na su esposa Nelida y tur su juinan, nieto y nietanan y e mundo deportivo y sigur e fanaticada di Efi, e Angelnan den shelo tabata brasa habri ansioso sperando riba e yegada di nan “Strea” nobo di tera. Efi Boxdo tabata un “Star” den su gloria. Efi Croes un persona ehemplar den mundo deportivo. Efi Croes popular bou di e nomber “Efi boxdo” tabata un tremendo atleta cu a practica e deporte di boxeo riba un nivel halto y tabata tin un trajectoria spectacular tanto nacional como internacional. Efi Croes na un edad hoben a bira hopi famoso na Aruba den e mundo di boxeo. No solamente como boxdo Efi Croes a destaca pero na un edad mas avansa Efi Croes a keda destaca como entrenador. Tur Efi su juinan y diferente nieto di un of otro forma a sigui su pasonan sea den Boxeo, Kick Boxing, MMA pa nombra algun. Efi Croes a yuda prepara y forma hopi atleta den e mundo di boxeo. Esaki tabata su pasion.
Efi Croes a box tanto na Aruba, Corsow y Venezuela. Pues Efi Croes a representa y saca cara di Aruba riba plataforma internacional. Primordialmente su famia pero sigur henter e pueblo di Aruba ta orguyoso di su logronan. Efi tabata activo desde 1954 pa 1980. Efi a bringa na Venezuela contra boxdo nan di taya internacional manera e 3 biaha campeón mundial den peso pluma Chicherito Medina. Den peso lihero Efi Croes a enfrenta otro boxdo internacional Bareto aki na Aruba. Efi Croes a gana pelea pa titulo contra Kid Zoro e campeón di Antiyas. Un biaha a puntra Efi cual tabata su pelea mas duro. Efi a contesta y a referi na un pelea na Corsow contra “Kid Ambrioso”. Momento cu a puntra Efi Croes pakiko “Kid Ambrioso”. Efi a splika cu El a balota “Kid Ambrioso” y no a practica y prepara su mes manera semper e ta hasi cu e resultado cu condicion a lage na caya y El a pasa den un scual formalmente pa finalmente gana pa punto.
Den un revancha Efi a train manera mester ta y a knock out “Kid Ambrioso” cu trankilidad. E les di bida cu Efi kier a splika akinan ta lo siguiente. Como atleta nunka balota bo contrincante pero percura semper pa Bo ta debidamente prepara. Efi banda di su carera deportivo den aña 2017 a ricibi un reconosemento special di partido MEP como un baluarte cu a sostene y a pasa den e lucha pa Status Aparte hunto cu e Lider inmortal Betico Croes. Como tata y abuelo Efi Croes ta masha stima y lo laga su simbolonan di un deportista cu curashi y determinacion pero alaves un sentido di amor atras pa su famia amistadnan y henter e pueblo di Aruba como recuerdonan masha valioso y eterno. Danki pa tur cos Efigenio “Efi Boxdo”” Papa Bieuw” Croes. Sosega na Pas.