E trahadonan di Excelsior Casino N.V. a nota problema serio cu e compania for di momento cu a opta pa no paga nan salario, riba dia 5 di april, ora cu mester a cobra e ultimo quincena cu nan a traha den luna di maart. Abogado mr. Falconi, den nomber di e doñonan, a conseha e trahadonan pa bay cobra 950 florin na FASE y asina “laba man” pa nan responsabilidad di pago. Pero awe e director a informa nan cu lo pidi bancarota pa e compania debi cu nan no por cubri nan debenan, ni si Gobierno yuda paga salario di e trahadonan.
Na tur ta papia di entre 70 pa 80 persona cu ta perde nan entrada mensual, sea nan ta traha directamente cu e casino of como contractant. Prome cu Coronavirus a manda varios di e contractantnan cas, aunke cu ta cuestionabel si nan ta freelancer of ta trahado, pasobra nan ta traha mesun hopi y mesun ora cu tur otro trahado directo, pero no ta aporta na SVb pa nan ni na ningun otro fondo social. Esey awor mes ta birando un reto pa e grupo aki por cobra na FASE of na cualkier otro instancia pa ayudo social.
Trahadonan ta hopi preocupa riba nan futuro, pasobra ta cuestiona cu e directornan, esta Alvaro dos Santos naci na Portugal y Luciano Boccia naci na Italia, aunke ambos procedente for di Venezuela, den forma delibera a laga e compania bay abou. Ta acusa nan di a hinca un suma cuantioso di placa por ehempel pa bin cu Daddy Yankee pa un concierto na Aruba pero ta nenga di cumpli awo cu salario di nan mesun empleadonan.
Doño di edificio di Holiday Inn Hotel no a renoba contract di huur
E director awor a informa e trahadonan cu e problema mas grandi ta huur di e espacio den Holiday Inn Resort. Nan tin un contract cu Pristine Estates NV di Alfredo Lowenstein, cu ta doño di e edificio. Nan tin un debe grandi cu ne, cu consecuencia cu ta nenga di prolonga e huur cu a caba awe dia 30 di april 2020. Tambe, e doño di e edificio a nenga di bin cu un plan di alivio cu e casino no mester paga huur durante e tempo aki cu nan ta cera. Probablemente e decision ta mara na e hecho cu no ta pagando huur manera debe ser.
Excelsior Casino a sigura e trahadonan di a haci tur lo posibel pa purba scapa e compania pero no a logra. Di otro banda, ta scuchando di practicanan duduso den operacion di e casino, por ehempel cu ta paga e trahadonan cash eyden, enbes di paga via banco. E trahadonan ta cuestiona con por ta posibel cu no tin placa siendo tin fondo di premionan grandi di weganan di mesa cu progresivo cu ainda nan no a gana eyden. Varios biaha hungadonan a gana cu no tabatin suficiente placa efectivo na e momento ey pa por a cumpli cu e premio.
Mal experiencia cu e grupo aki
E mesun grupo aki, aunke bou otro compania y entidad, a bin Aruba for di Venezuela y a cumpra of maneha Excelsior Casino, Aura Casino (na Barceló) y Cool Casino (na Riu Palace Aruba). Por lo menos un empleado cu a kita mas o menos un aña pasa for di Cool Casino a haci un denuncia serio contra nan, relaciona cu posibel practicanan duduso di labamento di placa. Con leu e investigacion ey ta, no ta conoci.
Por spera mas problema den otro casinonan
Tur hende ta corda con nan a laga Aura Casino bay bancarota manera nada no a pasa. Awendia tin otro operado y e casino, aunke chikito, ta draai. Parce cu ta e mesun grupo cu ta maneha The Casino@Hilton ta manehando Liv Casino@Barceló. Nan ta un grupo solido y no ta sperando problema. E otro reto ainda ta Orchid Casino na Riu Palace Antiyas, unda tambe ta spera di topa cu problema si hotel keda cera e luna di mei tambe. E otro casinonan cu ta opera bou di e mesun hotel, esta Renaissance, Marriott, Hyatt y Ritz Carlton tin mas forsa y no ta spera di topa cu problema pa awo.
SVb lo mester paga cesantia na e trahadonan
Pa awor aki, abogado di Excelsior Casino a conseha e trahadonan pa bay SVb pa cobra cesantia. Lamentablemente esey lo ta posibel te ora cu declara e compania bancarota. Pa alcansa e nivel ey, lo mester bay Corte, cu awendia ta trahando na un forma diferente of ta atende casonan urgente so, debi na reglanan nobo di distanciamento social. Lo mester haci un apelacion riba SVb pa duna e trahadonan aki un tipo di “adelanto” riba locual nan lo tin derecho riba dje, sperando pa canalisa e proceso di bancarota, cu por tuma algun luna mas di tempo. Den esaki e trahadonan mes tambe por encamina e proceso di pidi bancarota di e compania, solamente cu nan lo mester paga un abogado pa haci e procedura legal den nan nomber.
