Actualmente den e crisis relaciona cu Coronavirus, gran parti di comercio y empleadonan cu a perde empleo den sector priva na Aruba ta pasando den momentonan dificil. Di cuminsamento Sindicato di Trahadonan den Telecomunicacion (STT) a para semper pa e comunidad di Aruba y den e caso aki no ta exepcion. Nan a firma un protocol awe cu gerencia den cual nan miembronan lo entrega mas o menos mesun hopi compara cu empleadonan publico.
E sindicato a organisa un encuesta bou di su 340 miembronan, di cual 222 miembro a participa. Di e cantidad ey, 188 miembro (84.7%) a vota na fabor di e pakete di medida y 34 miembro (15.3%) a nenga di entrega. Aunke cu statuto di STT ta papia di un tercera parti mester participa, den e caso aki mas cu mita di e miembronan a mustra interes den e encuesta. E pakete cu miembronan a aproba ta encera un reduccion di salario mensual cu 5%, ta entrega mita di nan vakantie-uitkering y ta entrega un maximo di 1706 florin di nan bonus di Pasco.
Asina mes, e sindicato a pone un lista di condicion pa Gobierno, por ehempel nan ta boga pa e placa cu nan ta spaar aki mester bay den un fondo cu ta wordo maneha di forma transparente cu un Hunta di Supervision y cu e lo ta destina solamente pa esunnan cu perde trabou dor di Coronavirus. Ta boga pa Gobierno baha su gastonan tambe, bin cu un formula di pensioen adelanta pa tur cu a cumpli 60 aña di edad caba y riba dje, pa cambia e leynan di LMA den Gobierno. Ta boga pa un aparato gubernamental hopi mas eficiente y sin un nivel di AO asina halto. Ta exigi pa ningun pensionado por ta riba payroll mas di Gobierno den otro funcion, manera di coordinador. Tambe ta subraya cu gastonan di personal den Gobierno mester keda realistico.
A pone como condicion adicional, cu si acaso SETAR mes haya su mes den problema financiero y cu mester corta den salario pa salvaguardia e compania, cu lo no aporta mas na e fondo ey. A pidi Gobierno pa garantisa cu henter Aruba ta solidario den e causa aki y no solamente Gobiern y companianan estatal.
Awe STT y Director di SETAR a firma e protocol na unda ta acorda e contribucion cu miembronan di STT ta bay duna na e fondo di solidaridad. SETAR a sigura di ta solidario cu sector priva den e situacion actual.
