“WEB su splicacion riba e problema cu ya den corto tempo a causa 3 black out cu daño cuantioso pa nos economia y pueblo a pone cu mi tin un responsabilidad pa trece un discusion cu argumento. No pasobra mi ta MEP mi no mester duna mi preucupacion”, asina e lider honorario di MEP, Nelson Oduber, a expresa awe mainta riba su pagina di Facebook. Di ayera el a demostra su malcontento pa e forma con ta maneha nos compania estatal.
“Mi sa bon cuanto esfuerso a ser haci pa mehora e situacion di e planta, pasobra ta un so nos tin. No bin discuti cu mi argumento politico, pasobra esey mi lo lag’e pa esunnan cu kier sigui practica esaki. Mi contribucion ta a base di mi conocemento y experiencia como un bon Arubiano y pa señala cosnan pa yuda mehora e situacion”, di acuerdo cu e tata di Minister Dangui Oduber.
El a corda tur hende cu ta bou di su gobierno na aña 2005 cu a cumpra e tres motornan “Recip” pa produci coriente uzando 40% menos fuel. Oduber ta corda cu tempo e compania Wartsila a instala nan, cu ningun dia a basha henter e planta di coriente abou.
“Den e pais aki nos ta perde mucho tempo cu ken ta yui di ken, ruman di ken, ta drumi cu ken, ta biba cu ken, ta esaki esaya, ki partido e ta, etc. en bes di dedica bo tempo como Arubiano di yuda señala cosnan pa yuda dresa, pasobra al final ta nos tur ta paga e cuenta. Mira e giga debe cu 25 aña mas lo bo keda paga cu orguyo cu casi 300 miyon florin na interes so pa aña”, Nel Oduber a subraya.
E ex-Prome Minister ta corda cu basta aña pasa a firma e contract pa cumpra e ultimo planta Recip lV aki di Wartsila. Esaki a sosode bou di gobierno di AVP sin cu WEB/Utilities Aruba N.V. a traha e “programma van eisen” of a traha un “bestek”. Oduber ta corda di a yeg’i skirbi riba e asunto aki caba den pasado sin cu nunca a haya atencion. E gastonan pa e planta, segun Oduber, tabata mas cu 200 miyon florin y aunke e ta zona increibel, ainda a bin “meerwerk” di 45 miyon florin acerca!
“Awor, uzando asina hopi placa di pueblo bo ta expect un planta asina lo mester ta, pa e placa ey, un state of the art. Ami no por caba di compronde con den pasado nos a laga instala tres planta di Recip di Wartsila y no tabatin e problemanan aki cu nos a laga nos pais den scuridad!!”
Nel Oduber a scucha e Arubiano director nobo, cu e ta desea tur clase di exito, declara cu e ultimo planta Recip aki cu a bula nos operacion completo ta debi na “kinder ziektes”.
“Awo si esaki a sosode dia nos a start e prome planta lo por a compronde, pero no cu e di cuater! Nos mester por sa tur esakinan caba, a base di experiencia cu e otronan. Segun mi cu ta durante e instalacion di e planta a haci mal trabou y mester a controla e trabou. Fuera cu e proceso di construccion a dura mucho largo. No por ta asina cu dia a start esaki nos a haya blackout y awor dos mas den un dia cu ta bira tres. Algo tecnicamente no ta bon of ta eror humano tin. Mi ta kere cu mester bin mas aclaracion pa esaki.”
Mescos e ultimo planta cu ta produci awa, cu Gobierno di MEP a cumpra na 2005, un “Reverse Osmosis” di 8.000 ton, cu lo ta bon pa WEB vigila e proceso pa produci awa tambe. “No por ta asina cu proyectonan fantasma di ECO-Gas, Fly Wheel, zonnepanelen dilanti aeropuerto, cu tur e placa masacra den green conferences y otro aventura durante Gabinete Eman cu ta centenares di miyones di florin, mester laga nan spirito y mentalidad robes den e planta y biba cu ta asina cos mester tuma lugar. Mester cambia e mentalidad di mal gasta nos placa”, asina Nel Oduber a critica.
E lider honorario di MEP a termina bisando cu su interes como Arubiano ta pa mañan nos tin un continuidad den suministro di coriente y awa. E proceso ey segun e a deteriora, si no actua na tempo. “Mi no tin intencion di bringa cu ningun politico, pero ta nan ta responsabel pa cuida e planta aki pa nos y e generacion cu ta bin.”
