Jossy Brokke, un di Aruba su ciudadanonan di mas legendario a yega un logro monumental den su carera artistico e aña aki: 65 aña como un di Aruba su mihor cantautornan di tur tempo. Ban balor’e tanten cu e ta na bida. Jossy Brokke semper tabata un artista excepcional cu tabata tin e formula perfecto pa lanta e miho emocionnan den e ser humano. E sa perfectamente con pa inspira, motiva y empodera nos comunidad cu e mihor cancionnan y letranan. E aña aki e esfuersonan a wordo haci pa organisa y presenta un evento special den cual e artista monumental aki por experencia un berdadero tributo musical pa tur su trabao di bida largo y su esfuersonan pa eleva nos pais y e ser humano. Esaki lo tuma luga dia 1 di december 2021 den nos teatro nacional Cas di Cultura durante un anochi di gala yena di artistanan y amigonan di Jossy.
Un elenco extraordinario di e mihor cantante y musiconan local lo bini hunto pa rindi honor na e legendario local aki durante un produccion musical espectacular di dos ora cu lo wordo graba tambe y lo estrena riba plataformanan social, television local y television regional dia 5 di december 2021. Parti di e proyecto aki lo ta tambe un documentario biografico cu lo wordo estrena durante e prome mitad di aña 2022.
E ta sumamente importante pa hunto nos fomenta e pensamento cu nos tin cu reconoce y homenahea nos baluartenan tanten cu nan ta na bida. Lo ta un gran honor, alegria y satisfaccion pa Jossy Brokke mes mira con hopi nos ta stim’e, balor’e y tambe admir’e pa su trayectoria inigualabel. Esaki lo significa masha hopi mes mirando cu nunca den su carera di 65 aña largo algo asina grandi a wordo haci p’e. Alabes, e lo mustra bon tambe pa e pueblo en general cu nos artistanan local (specialmente esnan cu un trayectoria largo y impresionante) ta ricibi sosten y apoyo di pueblo cu ta para firme tras di su propio artistanan cu no solamente ta enrikece, proteha y promove e cultura di Aruba, pero ta percura tambe pa e bienestar general di un forma admirabel y positivo. Carchinan ta cabando pero tin obtenibel ainda na Cas di Cultura durante oranan di trabao y tambe a traves di telefoon 569 5442 pa entrega. Mirando cu e carchinan ta bayendo den un manera hopi acelera, lo no por tuma mas reservacion pero si por cumpra di biaha y sigura bo entrada pa e anochi historico aki dedica Jossy Brokke Jr.
