Grupo End Child Abuse cu ta para na bienestar di mucha a uni nan mes n’e manifiesto di diahuebs, 25 di november. P’e motibo ey nan tambe a presenta na e reunion sindical di awe na Stadion Frans Figaroa. Tambe a reacciona riba loke minister di Husticia Rocco Tjon a trece dilanti pa sinta hunto, unda nan ta para riba cu no ta sinta cu e mandatario door di su historia di a bay corte.
Danny Marquez di End Child Abuse a bisa como nan ta sali na vanguardia di e muchanan, nan ta uni n’e manifiesto grandi aki. P’esey el a invita tur hende pa yega plein di Juliana pa 3:00 pm y hunto cana bay direccion parlamento, unda nan ta bay entrega un carta. Aña pasa e grupo a bini hunto pa cuminsa manifesta unda nan a entrega manifiesto na gobierno cu diesocho punto. Asina nan a cuminsa purba yega na gobierno pa scucha nan.
A haci un town meeting invitando e 31 presidente di instancia y e ministernan di e tempo ey Glenbert Croes y Andin Bikker. Esaki tabata pa sinta hunto y delibera riba e puntonan pa mira kico por cambia, pero aki tampoco nan a haya un contesta. Un biaha mas nan a purba y a pone tres punto mas na e diesocho, di cual a entrega esakinan n’e mandatarionan dje tempo ey Bikker y Croes. En total a manda cinco carta pa gobierno cu nan puntonan riba e parti di abuso sexual, unda cu a haya informacion cu den gobierno mes tin persona cu tin algo di haber cu abuso di mucha, pero no a haya contesta. Esey a pone cu awo nan a uni na e manifiesto sindical. A purba cinco biaha y no a haya contesta, p’esey esaki ta bira di seis biaha cu nan ta purba yega na gobierno.
Minister di Husticia a informa cu e kier un reunion cu nan. Segun Marquez, nan no ta dispuesto pa sinta cu e mandatario, pa motibo cu e tabatin un caso di abuso di mucha. Como cu ta uni na e manifiesto y ta bay entrega carta na parlamento, aki nan ta bay pidi parlamento pa yama un reunion riba e topico di abuso sexual di mucha.
Pa un cobertura mas amplio lesa e edicion di TREMPAN di mañan.
