24ora.com su USA Desk a pasa bishita e trabounan di preparacion na Miami Gardens pa e Formula 1 Crypto.com Miami Grand Prix. E fin di siman aki Miami lo ta e centro di atencion pa e caredanan di autonan di careda. E caredanan lo tuma lugar rond di e stadion di Miami Dolphins esta e Hard Rock Stadium. Durante e recorido di 24ora.com por a mira tur e trabounan logistico cu ta tumando lugar pa cu e evento aki. E evento aki ta un dia e mas di 20 caredanan cu e organisacion di formula 1 ta organisa den 20 pais. Pa loke ta Miami, e ciudad a cera un acuerdo di diez aña. E motibo di esaki ta cu e evento di magnitud aki ta ‘boost’ e economia cu mas di 350 miyon dollar.
Esaki sigur ta algo cu cualkier ciudad lo desea. Remarcabel di e pista ta cu esaki normalmente no ta un pista. Pues, a traha un pista rond di e stadion. Na dos ocasion e pista tin cu hasta crusa caminda publico. Naturalmente durante e evento esaki lo ta cera pa trafico regular. No ta solamente caredanan di auto lo tin pero tambe presentacionan musica manera di DJ Tiesto, Wisin y Yandel y otronan. Entrada general pa e fin di siman ta costa casi $600. Tin seccionan VIP tambe cu por hasta costa $10.000.
