Recientemente a drenta e grato noticia cu a nombra casa di nos minister presidente, Kenneth Wever, como director nobo di All To Car. A apunta Wever den e posicion aki debi cu nan tabata den buskeda di un persona local cu conocemento pa dirigi e compania exitosamente.
Den un conferencia di prensa cu a tuma luga awe mainta, minister presidente, mr. Evelyn Wever-Croes a trece pa dilanti su reaccion riba un voicenote cu tabata circulando rond siman pasa den cua tabata bisa cu gobierno lo kibra tur contract di lease pa manda tur na un solo compania, esta All To Car.
Wever-Croes a desmenti esaki por completo enfatisando cu gobierno no por kibra ningun contract di lease. El a amplia splicando cu ora cu el a asumi carga di minister presidente den gabinete Wever-Croes I el a yega haya cuater auto gelease pa e ministerio di dje, cu el a bisa e no mester di cuater, sino un of maximo dos. El a purba kita dos for di su presupuesto, pero no por a kibra e contract y asina a pasa esaki pa otro departamento cu tabatin mester di dje.
Pa loke ta e echo cu sa casa a asumi e posicion di director na All To Car, Wever-Croes a comenta cu tur e mensahenan aki tabata draai rond di cu su casa a haya trabou den sector priva, despues di un aña y mey sin traha. Wever-Croes a cuestiona e polemica ya cu e no ta compronde dicon tin critica pasobra su casa a haya trabou den sector priva y el a puntra “acaso un casa di un politico no tin derecho di traha pa mantene su famia?”
Pa un relato mas amplio, lesa bo proximo edicion di TREMPAN.
