Evelyn Wever-Croes a papia dialuna merdia na radio den su calidad di lider di partido Movimiento Electoral di Pueblo (MEP) pasobra el a sinti cu despues di e yamada cu oposicion a haci pa un reunion general, e tin mester di pone cosnan den perspectiva pa pueblo di Aruba, indicando tur intento pa pueblo lanta ta simplemente un tactica di Partido di Pueblo Arubano (AVP) pa distrae atencion for di e caso penal grandi contra candidato Benny Sevinger.
Wever-Croes a cuminsa na bisa cu e ta ripara cu tin un nerviosismo, un preocupacion pasobra e partido oponente AVP ta yamando pa reunion pa lanta hende, pa lanta pueblo. “Pakico AVP tin un ansha di morto? Pasobra e caso di Benny Sevinger ta bin aki dos siman.” E ta cuminsa 15 di september. E caso di Benny Sevinger ta hopi importante pasobra, segun EWC a wordo informa, Benny Sevinger a menasa den na partijraad cu si e bay, nan ta bay cu ne. Pesey tin un ansha pa baha gobierno prome cu e caso keda cla, pasobra nan ta kere cu asina nan por influencia e resultado, manera tempo di Tico Croes.
Segun e lider di MEP, Benny su caso ta hopi serio den cual ministerio publico a publica con ta bay trata e caso aki. Ta bay tuma di september te januari pa trata full e caso di Benny Sevinger. Esey caba ta mustra bo con grandi y conserio e caso aki ta. E prome luga, na september, ta bay investiga con Benny ta bay privilegia su fundacion di campaña, cu yama Curason Berde. Con el a privilegia su fundacion cu placa di tereno. E tin un fundacion cu el lanta pa core campaña manera mayoria político tin. Esey el a percura pa na un of otro manea yega na placa di tereno.
“Despues, na october, e ta bay riba algun comerciante cu el a yuda. Eynan Leoncita, tur e bada bada ta wordo trata. Nos lo tende tur loke tin den e file diki ey di con el a yuda comerciantenan. E siguiente luna cu ta na november, ta otro grupo di comerciante cu el a yuda tambe y cu e lo a haya placa tambe y na december ta bin e caso di Benny mes”, asina Wever-Croes a declara na radio.
Ministerio Publico, despues di investiga, a yega na conclusion cu el a haci su mes castigabel na diferente punto. Un ta abuso di poder. Esey kier men cu bo ta minister, pero bo ta malusa posicion di minister pa bo gana placa. Otro ta labamento di placa. Labamento di placa kier men paga cos bou mesa, no paga belasting riba nan. Otro ta falsificacion di documento, pone firma pa falsifica cos.
Wever-Croes: “No ta papiando di co’i loco; ta un caso grandi y p’esey tin un ansha di morto cu kier lanta hende, cu kier lanta sindicato, kier lanta gremio. Ta haci tur loke nan por, pa haya atencion. Loke nan kier ta baha gobierno pa AVP drenta gobierno y di un manera of otro y den nan sistemanan, semper coruptivo, purba pa e caso di Benny aki para.
Pa e relato completo, lesa TREMPAN
