Durante di e reunion publico den Parlamento tratando e presupuesto supletorio, prome minister Evelyn Wever-Croes, a contesta preguntanan haci pa parlamentarionan Setty Christiaans-Yarzagaray, Edgard Vrolijk y Hendrik Tevreden riba Serlimar.
Wever-Croes tabata tin un prome reunion preliminar cu Serlimar y nan a informa cu e meta, cual ta vision di henter e gobierno, ta pa Serlimar por bira un compania cu ta haci ganashi, pa e bira e miho den e ramo di pikimento di sushi na Aruba.
Esaki ta beneficioso pa empleadonan y ta beneficioso pa Aruba en general. Esey ta e vision, segun e mandatario.
Tin riba presupuesto supletorio 6.5 miyon florin y a haci pregunta cu si esey ta suficiente of mester di mas placa y e prome minister a contesta cu esey ta suficiente. Loke nan tin mester pa nan por paga y mediado di e luna aki nan placa ta caba. Ta hopi importante pa haya e placa aki, cu aprobacion di Parlamento.
E ora no tin duda mas, ni den pago di salario, ni e pago di e gastonan operacional. Despues e ora Serlimar lo bay traha riba e cobransanan. Ta responsabilidad di Serlimar pa cobra e servicionan cu nan ta duna. A base di esaki nan por cubri nan gastonan den futuro, banda di loke Gobierno ta duna nan como presupuesto.
Tur e discusion riba e 6.5 miyon no lo tin mas den futuro cu un maneho responsabel asina.
Serlimar ta den un surseance van betaling. E meta cu ta trahando riba dje awo, cu e debenan cu ta den surseance pa ta paga entre un pa tres aña.
Loke ta trata belasting, por ta un periodo mas largo, door cu ta gobierno. Pero tur e otronan si entre un pa tres aña. E ora por elimina e surseance van betaling y e compania por sigui como un Sui Generis.
