Evelyn Wever a cumpli 10 aña den politica

Ayera Prome Minister Evelyn Wever Croes a cumpli 10 aña den politica. Un trayectoria cu a exigi hopi trabou duro y sacrificio, sinembargo pa e mandatario principal di nos pais, e amor y tempo cu e ta pone den politica ta cu un solo meta, pa pone e ser humano central, creando oportunidad pa tur ciudadano di nos pais sinti e prosperidad y bienestar cu ta brinda nos tur.

ESTUDIO Y CARERA

Prome Minister Evelyn Wever Croes a studia ley na Universidad di Antias Hulandes na 1985 pa 1986. Despues cu el a obtene su titulo di ‘kandidaats’, el a bay studia na Hulanda na unda el a studia ley di belasting na Universidad di Leiden y a termina su estudio na 1989. Na su regreso na Aruba, Prome Minister a traha na SIAD for di 1989 te cu 2003, na unda cu el a bira hefe di departameno na aña 2003. Despues el a traha na e bufete di abogado Croes, Wever & Tchong te cu 2010 prome como consehero fiscal y desde 2008 como abogado.

POLITICA

Na aña 2009 Prome Minister Evelyn Wever Croes a cambia su carera di consehero fiscal y abogacia, pa politica. Den eleccion 2009 Prome Minister a saca su mes, y a drenta Parlamento. Na aña 2011, momento cu sr. Nelson Oduber a tuma su retiro di politica, Prome Minister a postula su mes pa eleccion di lider di partido MEP y a gana e eleccion, Prome Minister ta lidera e prestigioso partido MEP desde 2011 guiando un ekipo di candidatonan determina pa trece un cambio y haci un diferencia positivo den bida di tur ciudadano di Aruba.

PARLAMENTO

Den Parlamento Prome Minister Evelyn Wever Croes a distingui su mes pa e nivel di debatenan, y especialmente e contenido di e debatenan, tratando di trece cambionan den leynan caminda cu ta necesario.

Evelyna Christina “Evelyn” Wever-Croes, un hurista y fiscalista di 50 aña di edad, dia 17 di november 2017 a asumi e puesto di Minister Presidente di nos pais. El a bira e prome hende muhe pa encabesa gobernacion di pais Aruba, despues di Henny Eman, Nel Oduber y Mike Eman. El a participa den eleccion pa prome bez pa Partido Movimiento Electoral di Pueblo (MEP) na aña 2009 riba number 3 di e lista y a logra 1621 voto. Na aña 2011 el a asumi liderazgo di e partido cu su mesun omo a funda na 1971 y a bira e prome lider femenino di e partido, despues di defunto Betico Croes y Nel Oduber. Como lider den eleccion na aña 2013 el a logra 3396 voto individual, mientras den e ultimo eleccion na September 2017, aunke e partido a bay dilanti cu 2 asiento, toch e votonan individual no a aumenta tanto, pero tabata bon pa 3503 voto riba nomber di Evelyn Wever, cu ta representa un aumento di 3.15%. Mr. Evelyn Wever-Croes a studia ley na Universidad di Antias na aña 1985. Despues el a sigui pa Leiden, Hulanda, unda el a studia ley fiscal (Belastingrecht) te cu aña 1989. El a traha como Inspector di Impuesto di Aruba entre 1989 y 2003, trahando bou Gobierno di AVP y MEP. Evelyn Wever-Croes ta casa cu Kenneth Wever desde aña 1991 y ta mama di Claudine Wever, Christine Wever y Kevin Wever y ta wela di Trystan Wever.

PROME MINISTER DI ARUBA

Den e eleccion na september 2017, pueblo a vota pa un coalicion. Prome Minister a fungi como Formado di un Gobierno nobo. Un Gobierno basa riba un programa di gobernacion solido y transparente firma dia 1 di november 2017, cu e meta pa pone e ser humano central. Dia 17 di november, Evelyn Wever Croes a huramenta y a marca historia di nos pais como e prome Minister Presidente femenino di nos pais. Y esaki tawata e comienso di Gabinete Wever-Croes.

META DEN POLITICA

“Politica ta exigi trabou duro y hopi sacrificio, pero ami ta haci’e cu hopi amor, satisfaccion y compromiso, pasobra asina realmente mi por yuda esunnan cu tin mas mester di dje. Mi meta den politica? Crea oportunidad pa tur hende, specialmente hende muhe y hobennan, por desaroya y duna di nan parti pa hiba nos pais riba e caminda di bienestar pa un y tur”, asina e prome mandatario di nos pais a duna di conoce.

Noticia relacionaMas for di e autor