Minister Dangui Oduber: SABA a uza placa di rechttrekking pa otro proposito

Na momento cu a drenta gobernacion, un di e prome preocupacionnan cu a atende cun’e, ta e preocupacionnan di e trahadonan di SABA cu e tempo ey nan a informa gobierno cu tabata tin un suma di placa cu ex minister Schwengle a presupuesta pa cumpli cu un pago di un rechttrekking cu nan tin derecho riba dje.

Ora cu a cuminsa cu e proceso pa haya e informacion, sinta na mesa cu SABA, sinta na mesa cu Directie Financien, scucha departamento di Recurso Humano pa wak kico ta e situacion cu ta reinando na e momentonan ey y con gobierno, como minister responsabel pa e maneho di SABA, por cumpli cu e pago, mirando cu e trahadonan tin añas ta wardando riba e pago aki.

Segun Minister Dangui Oduber, no ta discusion di un aña, sino di decadanan caba cu e trahadonan ta wardando riba e placa aki. Loke a bin resulta a base di informacionnan ricibi di diferente corespondencia cu a haya, cu e rechttrekking no a tuma luga di awe pa mañan.
Ta basa riba e director di SABA cu a dirigi na exminister Schwengle. El a haci un peticion y a menciona un suma di placa tambe den e peticion por escrito, cual el a haci na e ex minister, bisando cu e trahadonan tin derecho riba un rechttrekking nivel 3. Nan mester pa gobierno inclui den subsidio un x cantidad di placa, pa asina por paga e trahadonan ey y cumpli cu esaki tambe. Ora cu a haya e informacionnan aki, ora cu a lesa tur e corespondencia aki, a dirigi un carta pa director di SABA, bisando cu a mira den presupuesto cu en berdad e suma di placa a wordo presupuesta y directie Financien a confirma cu e transferencia di suma di placa a tuma luga tambe.

 

Logicamente e prome pregunta cu ta surgi ta, cu si e placa a wordo presupuesta, e placa a wordo transferi, kico a sosode cu e placa. Pakico e trahadonan no a wordo paga ainda.
Esey ta e discusion ainda cu ta andando, pasobra, te dia di awe e trahadonan no a wordo paga. A tene un reunion algun luna pasa hunto cu minister di finansas, hunto cu director di SABA, hunto cu Raad van Toezicht di SABA y directie financien, pa por duna claridad na e trahadonan, na e sindicatonan cu ta SEPPA y ABV, ki dia porfin e trahadonan aki ta wordo paga. Minister Oduber ta di acuerdo, den e lucha cu nan ta hibando, cu nan tin derecho riba e suma di placa. Ta deber di gobierno pa wak con ta paga e trahadonan aki. E punto di discusion ta, cu gobierno no por paga algo cu a wordo paga caba. E placa a wordo presupuesta y e placa a wordo transferi. SABA no a paga e trahadonan e rechttrekking aki y esey ta e discusion cu tin keto bay na e momentonan aki.

E punto di salida di gobierno ta, cu ta confirma cu e placa a bay. SABA ta confirma cu el a ricibi e placa, pero den opinion di SABA e placa cu nan a ricibi no tabata pa paga e rechttrekking, sino a ricibi e placa conforme e areglo di subsidio cu nan tin cu gobierno. Cu gobierno semper a keda debe nan 10%. Gobierno ta subsidia SABA 100%. Den e caso di den opinion di SABA tur e añanan cu a bin ta transcuri, Gobierno tabata transferi 90% di e suma. Semper a keda falta 10%. Ora cu e suma di placa a wordo transferi pa paga e rechttrekking, conforme e peticion di SABA, SABA a bisa cu tabata e 10% cu tabata falta tur e añanan aki. Nan gastonan a bin ta aumentando, gastonan di cuido a subi y nan a argumenta cu e placa a wordo uza pa cubri e buraco cu a existi e ultimo aña. Gobierno no ta di acuerdo cu e pensamento ey. Ta di opinion cu a haci un peticion pa paga e rechttrekking. Gobierno ta transferi e placa pa paga rechttrekking y SABA ta uza e placa pa otro proposito. Un di e discusionnan cu tin continuo cu SABA tambe ta cu no por ta asina cu tin un fundacion, Stichting Bejaardenzorg, cu ta percura pa cuida nos grandinan.

Gobierno den e caso aki ta duna un subsidio di 23 miyon florin y gobierno no tin ningun autoridad. Gobierno tin ni un miembro den e Raad van Toezicht. Pa gobierno den un situacion asina, no por ta posibel, cu Gobierno ta esun cu ta duna tur subsidio, y no tin nada di bisa. Pasobra gobierno kier soluciona e problema aki. Kier cumpli cu e trahadonan. Gobierno ta buscando tur posibilidad pa cumpli cu e trahadonan. Gobierno a bin compronde cu SABA tin un reserva y ta bay haci un apelacion na nan, pa haci uzo di e reserva cu nan tin, pa cumpli cu nan deber y obligacion di rechttrekking pa tin trankilidad bao di e trahadonan. E minister ta compronde nan preocupacion. Ta compronde nan frustracion. Pero como gobierno, e minister no por traspasa un suma di placa cu a wordo traspasa caba. Den e caso aki SABA tin cu coopera cu gobierno, haci uzo di e reserva cu a bin di compronde cu nan tin, pa asina cumpli cu e trahadonan finalmente.

Speransa

Minister Oduber a splica cu mester por ta posibel pa tin un speransa. Si di berdad e reserva aki ta existi, e ora ta mas na su luga pa SABA haci uzo di e reserva aki. A manda un carta caba pa nan, pero no a haya contesta ainda. A yega di manda carta caba den pasado. Ta pio cu e situacion cu tin na Fundacion Lotto pa Deporte. A yega di manda carta pa director di SABA y esaki a yega di bisa den carta, cu no tin nada di bis’e. Esey ta e situacion cu ta aden actual. A manda e carta caba bisando cu si en caso tin reserva, segun e jaarrekening ta demostra, cu tin reserva, haci uzo di dje.

Kico SABA a haci ora cu a haci e peticion, e no a haci’e por escrito sino durante reunion. Durante reunion a puntra nan si tin e reserva y ta desea pa nan haci uzo di e reserva pa paga e trahadonan, SABA a contesta cu si nan bay haci uzo di e reserva, nan ta bay cuminsa cera cama. Esta cu no ta bay atende cu e demanda grandi mas cu tin di peticionnan pa duna servicio na nos grandinan. E minister no ta kere cu esey ta un manera, e ta algo hopi iresponsabel pa atende cu un tema asina delicado. Na final di dia ta e trahadonan aki ta esunnan cu ta lanta tur mainta, keda 24 ora pa dia, atende cu nos grandinan. Gobierno mester garantisa un cuido digno na nos grandinan y no por tin un fundacion asina aki cu tin mal contento cu ta reinando entre e trahadonan pasobra no a cumpli cu e pago cu nan tin derecho riba dje pa añas.

Pronto lo bay sinta na mesa cu e sindicatonan cu ta representa e trahadonan pa un update. Mientras tanto e suma di placa cu nan tabata di haya, a keda acumula. Departamento di Recurso Humano ta haciendo un calculacion di nobo pa wak na e momentonan aki kico e trahadonan tin derecho riba dje. Aña pasa nan tabata tin derecho riba un suma. Pero un tempo a pasa atrobe y awor esaki a cambia. Tur e calculacionnan aki ta wordo haci hunto cu Directie Financien, pa asina tur tin claridad cu esaki ta e cantidad di trahadonan cu tin derecho riba e placa y esaki ta e suma corespondiente y despues ta e suma cu SABA tin cu saca for di su reserva pa cumpli cu su trahadonan.