Eugene Rugghenaath: Venezuela no por crea division entre Aruba y Corsou

E habrimento di frontera di Aruba tabata un intento di parti di Venezuela pa crea division entre e paisnan ruman y tambe den Reino cu naturalmente no tabata exitoso, den e sentido cu ta considera cu tin un solo frontera cu Venezuela, cu porcierto, di nan banda, unilateralmente nan a cera y no por habri frontera pa Aruba y tene cera pa Corsou.

Pesey gobierno di Corsou ta consider’e cera ainda. Como tal, ta hunto cu Aruba den esaki y ta sigui delibera con ta atende cu Venezuela riba esaki, segun prome minister di Corsou, Eugene Rugghenaath.

E ta trece desafio pa Corsou tambe di un banda, pasobra no tin trafico comercial, pero tampoco di famia, etc. E hendenan na Corsou cu tin cu bay bek nan pais, tampoco no por bay. A lo menos sin haci hopi gasto. E ta algo lamentabel segun e prome mandatario.

Pero Venezuela no por crea division entre e dos paisnan y ta contento cu nan ta para hunto.

 

Intervencion

Segun e prome mandatario di Corsou, tin dialogo entre Venezuela y e paisnan den Reino, mirando nos interesnan. E afan ta pa bin cu un solucion pa e situacion na Venezuela mes. Den cualkier manera cu Corsou por sostene e pueblo Venezolano manera cu a haci cu e disponibilidad pa ta hub logistico pa ayudo humanitario. Pero tambe den dialogo cu por tin cu por ehempel International Contact Group y tambe otro gruponan di bisiña pa yuda Venezuela yega na un stabilidad y prosperidad atrobe, di parti di Reino tin cu participa den esey mirando cu nos ta bisiña y tin un futuro comun hunto.