Aruba tin un gobierno comunista na poder y pueblo ta sufri. Berdad cu despues cu e gobierno aki cu a join CommonTrust Network dia 17 di december 2020, cu ta forma parti di World Economic Forum, nos situacion a bira pio. Un di e punto cu World Economic Forum ta uza rond mundo ta “defund the polis” y asina nan por bin cu nan mesun cuerpo pa trapa riba e derechonan di pueblo.
Na Hulanda nos mira cu a persigui un ciudadano cu a manifesta pacificamente, mientras cu tin 70 mil keho duna contra di minister Hugo de Jonge pa menasa, instigacion y discriminacion no ta persigui. Esaki ta locual netamente locual nos ta bibando den e tempo aki. Nos Cuerpo Policial falta di material, edificio den mal estado y ta sigui maltrata nos polisnan. Locual cu a pasa na Chicago awe nos ta bib’e na Aruba.
Costo di bida a subi te den blafon y awor nos por mira cu nos caretera ta bashi. Un pueblo cartera bashi no por cumpra y automaticamente comerciante lo no tin. Situacion lo sigui empeora y gobierno lo no scapa di e wega diabolico cu nan ta hungando. Prome minister a caba di firma pa hisa edad di pensioen na 66 aña na 2025. Diabierna gobierno ta manda un mensahe p’e empleadonan publico cu lo kita atrobe mas placa for di nan salario despues di a gaña e empleadonan publico cu lo haya nan 7.6% bek.
A tira lodo riba nan contrincante politico, pero awor e djaca ta den cas. Na Arubahuis tabata fiesta cu placa di pueblo. Asina mes cu for di mei 2021 prome minister tabata na altura di e situacion na Arubahuis no a tuma paso pa para e fiesta. E minister pleniponteciario ta resorta bao di prome minister y ta responsabel pa locual cu ta pasa na Arubahuis. Awor si kier tapa e corupcion cu a tuma luga. Un partido RAIZ morto ta laga sa cu no tin problema cu no a entrega keho.
Prome minister ta papia di haci e tereno di e refineria limpi, pero ta regala Citgo 175 miyon dollar. Pais Aruba ta tur pluma for di unda lo saca placa pa haci e tereno limpi? Unda e gobierno comunista aki mishi ta daño so nan ta haci. Nos a ricibi informacion cu a uza e companianan estatal pa emplea mas cu 200 persona ya cu nan no por a duna nan trabao den gobierno. Wel e solo ta bahando y e careda di bina ta bay yega na su fin. Aruba no por cay na rudia pa un gobierno comunista.
E districto di Oranjestad tin mas cu 36 aña sin ta conta cu un edificio drechi pa polis. Nos por corda cu na aña 1987 mester a muda e warda di polis for di Arnold Schuttestraat pa a traha un hotel. A drecha e edificio den Wilhelminastraat 40 cu tabata un banco y a transform’e den un warda di polis. Ora cu a traha Centro di Husticia na Santa Cruz top di polis a bay sinta na Santa Cruz, mientras e warda di polis den Wilhelminastraat tabata den decadencia. Esaki a tuma luga prome cu 2005. Nos por corda cu na aña 2013 cu un parti di warda di polis tabata den un estado asina deplorabel y a move un straatdienst pa Judra Buiding na Dakota. E di dos piso tabata tur na schimmel y a move e departamento pa Frankrijkstraat, mientras cu Centrale Post y leiding di straatdienst a keda na Oranjestad. Despues di hopi lucha y para firme a logra muda na juli 2015 pa otro banda di caminda, unda tabata Dimas na Wilhelminastraat 31/33. E polisnan no tabata na altura di e condicion di e edificio, pero a bin haya sa despues di e situacion te cu a laga tuma monster di e aire pero un dia prome a core laga limpia e duct di airco.
Segun cu nos por a compronde un persona conoci cu a traha den e edificio ey a haya problema cu schimmel y a bira basta malo. Tanto e gobierno di MEP y AVP e Cuerpo Policial den e ultimo binti añanan no tabata importante. Awe nos Cuerpo Policial tin scarsedad di polis y ta sigui sacrifica e organisacion. Kico ta e secreto su tras? Awa a pasa hariña y e miembronan di Cuerpo Policial no kier papia mas sino accion y cu tur rason di mundo.
Pa aña Aruba ta goberna pa hende cu sabiduria humano, pero sin temor di Dios. Nan tabata asina orguyoso di nan sabiduria pero sin temor di Dios. E sabiduria humano a hiba nos den e desastre cu nos ta bibando. Berdad cu e hendenan orguyoso Dios ta mira nan di leu. Nos a yega na e crusada pa nos busca Dios pa haya Su sabiduria pa sali for di locual cu pa hende ta mustra imposibel. Nos mester di Dios pa transforma locual pa hende ta mustra imposibel bira posibel. Ta tempo pa e yiunan di Dios yena cu e Spirito Santo di Dios goberna pa marca un diferencia. Ta tempo tambe pa Aparta for di Core.
