Lider di Partido CURPA, Eric Ras e ta di opinion cu Hulanda a bin ta hala atencion di Pais Aruba for di basta tempo caba pa trece cambio den su situacion financiero. Nos por corda cu na 2014 nos gobernador a nenga di acorda e presupuesto di Aruba y CAft a haci su introducion na Aruba, pa colmo, sin cu a exonera Aruba di su debe manera a sosode cu Corsou y St. Maarten.
Ni CAft, sin embargo, a logra e obhetivo pa gobierno cumpli cu e palabracion pa drecha nos finansas publico. Na 2017 pueblo a kere e partido mayoritario den gobierno awor cu nan si tin e solucion pa e mega debe, anto sin medida. Otro mentira pasobra e gobierno bou di signatura di MEP a logra hinca nos pais den mas debe pa locual awor nos a perde nos autonomia financiero.
Na 2015 PromeMinister di Hulanda a bay New York y a firma un acuerdo cu Nacionnan Uni compaña pa Prome Minister di Aruba tambe. Partido Curpa ta convenci cu na New York lo tin cierto palabracion a tuma lugar, palabracion cu lo a mara nos isla sin cu a consulta cu Parlamento. Decisionnan cu ta tuma pa un persona y ta afecta henter nos isla y tur esaki den secreto. Akinan ta unda mester bin un stop. Nos isla ta den un situacion financiero hopi precario y mester haci algo.
E secrecia den gobernacion, e falta di transparencia, como tambe e falta di un control debido di parti di Parlamento, ta e causa cu a hiba nos pais den un estado mas pio. A traha un beleidsplan pa baha empleadonan publico for di 2018 caminda gobierno di Aruba a bay di acuerdo, pero nunca a haci nada. Al contrario, no ta un secreto publico cu a hinca mas hende den gobierno. Na juli 2021, despues di eleccion, Prome Minister ta core manda e beleidsplan concerni Parlamento. E plan sinembargo no a wordo trata den Parlamento, pero ta uza si ora cu empleadonan publico mester haya nan promocion. Huez a bari esaki for di mesa caba paso e no ta uno legal. Empleadonan publico ta gasta nan placa y nan tempo den e tempo di crisis pa haya nan derecho cu sigur sigur no ta husto.
E situacion financiero cu Aruba ta aden ta parcialmente culpa tambe di Hulanda, paso a laga Aruba prolonga e situacion aki te cu awor no por haci nada mas. Hulanda a laga Aruba sigui coba e pos y bira esclabo di debe paso Hulanda sa cu no ta keda nada cu Aruba otro cu tardi of tempran di bati na porta di Hulanda pa placa. Esaki ta e plan di world economic forum: “you own nothing and you will be happy”. Nos Prome Minister a bay scondi despues di a bishita e kelder di su omo dia 13 di november 2020 Hulanda y den e videonan nos prome minister ta bisa di ta di acuerdo cu “COHO”. Tempo cu a lucha pa Status Aparte ta un delegacion a bay pa negocia cu Hulanda y awor un persona ta mara Aruba den un “COHO”.
Ora un decision unilateral ta wordo tuma ta paso tin un agenda scondi. Den e caso aki nos tur sa cu nan ta sigui pa implementa e 17 punto cu tin den e agenda 2030 di Development Sustainable Goals unda e hende ta perde su derechonan. Akinan tanto partido MEP y AVP ta riba mesun linea paso nan ta forma parti di e agenda. Nos di partido Curpa a ricibi informacion di e reunion secreto di e 2 partidonan aki prome cu a bay e reunion di IPKO. E resultado di reunion di IPKO ta papia pa su mes. Partido Curpa no ta kere cu mester implementa e acuerdo di “COHO” firma pa prome minister manera cu e ta. Costo di bida ta hopi halto y lo bay bira pio. Berdaderamente nos unico caminda ta busca Dios di curason pa asina nos por ricibi Su bendicion. Esaki ta e tempo pa yiunan di Dios cu curason puro y sincero tuma posicion den nos gobierno pa nos por mira e cambio cu nos ta desea. Ta tempo pa nos salba nos Aruba for di man di hendenan cu no tin amor pa nos patria tan sitma. Si nos busca Dios nos lo ricibi Su sabiduria y no sabiduria di mundo cu tin nos unda nos ta awe. E malbado ta ricibi su castigo aki na mundo y e husto lo ricibi su bendicion.
