Prome Minister y Minister di Salud a bay felicita enfermeronan personalmente

Diahuebs mainta y den cuadro di Dia di Enfermeria, Dr. Horacio E. Oduber Hospital a tene un celebracion special den forma di un desayuno pa su personal. Na esaki a invita Prome Minister di Aruba, mr. Evelyna Wever-Croes y Minister di Salud, Danguillaume Oduber. Adicional na e encuentro, e mandatarionan a haya un recorido door di e diferente departamentonan di hospital caminda tabatin oportunidad di saluda y gradici e enfermeronan personalmente. Ambos minister a expresa tambe palabranan di reconocemento y elogio pa e trabou importante cu e profesion aki ta aporta.

“E bunita ta cu unda cu nos a bay awe, sea ta den gang of pafo, combersando cu pashent, ta palabra di elogio so nan tin pa cu nos enfermero y pa e cuido cu hospital ta duna. Algun di nan den espacionan renoba di hospital ta bisa cu e luga a keda nechi y bunita, pero e servicio nan a enfoca riba dje,” Premier Wever-Croes a comenta. E ta consciente cu e trabou di enfermeria ta bou di hopi presion ya tin un scarcedad na personal. Esey so caba ta pone cu nan tin cu traha trabou di mas hende. Tambe sa cu tin reto den cuido pa loke ta financiamento di e gasto den cuido y cu mester corda. “Nos ta purbando di tur manera pa nos po logra di duna bek pa asina tin mas fondo den cuido pa inverti y pa expande e cantidad di personal.” 

E mandatario a expresa su danki enorme pa e dedicacion di tur enfermero durante e temporada dificil di covid y despues cu e dificultad no a kita. Despues di covid, hopi enfermero, e cansancio a domina, a bira poco malo y e presion riba otronan a bira mas grandi. Wever-Croes ta convenci cu aki ta un grupo di persona special, dedica y cu awe bo ta wak nan hopi contento y hopi uni. “Danki di curazon pa tur loke boso ta haci.”

Minister di Salud Publico a uni na e manifestacion di gratitud. E tambe a pasa diferente deparatamento pa personalmente gradici tur e enfermero cu ta cuida nos pashentnan, cu ta brinda un servicio hopi halto y di calidad. “Nos ta sumamente gradicido y satisfecho cu nos por a bin awe pa e dia special aki, celebrra hunto cu nan y gradici nan.” El a splica cu e profesion di enfermero of enfermera no ta un profesion facil; bo tin cu traha nachtdienst, den weekend, den dianan di fiesta, kier men e ta un profesion cu ta rekeri hopi esfuerzo, hopi empeño di tur e trahadonan. Como gobierno nos ta aprecia e trabou cu nan ta haci pa nos comunidad, pa tur pashent y tur cu mester di cuido,” Oduber a expresa. E tambe a señala cu el a mira pashetnan hopi contento cu e nivel di cuido cu ta brinda. 

Pa mas lesa TREMPAN.