Djadumingu pasá despues di mas ku un luna di warda porfin e kurpa sin bida di Jarzinho Pieter a yega Kòrsou for di Haiti. Un momentu hopi duru i doloroso pa famia, amigunan i konosínan. Entiero lo bai tuma lugá djárason 23 di òktober na World Trade Center unda pueblo di Kòrsou por duna Pieter su honor meresí i tres’é na su último lugá di sosiegu.
Manera ya ampliamente konosí, e grupo ‘Amigunan di Pieter’ a diseñá un Tshirt koló neon bèrdè mashá speshal ku nòmber di Pieter i su number 22 riba dje inkluso e lema di Pieter kua ta “Love Puru Papa”. E idea ta pa medio di bendementu di e Tshirt aki lanta fondo pa e yunan di Pieter. Prijs di e T-shirt bunita aki ta 25 florin for di kua un parti supstansial ta bai na e fondo.
Den simannan ku a pasa ya diferente hende a kumpra nan Tshirt na Mr & MS Exclusive na Santa Maria of Saliña. Tambe diferente medionan di komunikashon a duna un man pa gratuitamente promoshoná e video ku ‘Amigunan di Pieter’ a laga traha. Tur hende por lo tanto a komprondé e mensahe i ta dispuesto pa duna un man. Un gesto bunita tabata ora tur hungadó di e teim nashonal di futbòl di Aruba pa nan wega kontra Jamaica aki na Korsou a kumpra nan Tshirt i a hasi nan warming up den dje komo muestra di nan apresio pa e defuntu Pieter.
Amigunan di Pieter ta gradisí tur hende ku a kumpra e Tshirt kaba i tambe for di awor ta gradisí tur esnan ku ta bai hasi esaki ainda promé ku entiero. Pa mas informashon riba e inisiativa di Tshirt aki por konsultá i ‘like’ e página di FaceBook: https://www.facebook.com/pieterkidsfund. E página alabes por wòrdu uzá komo plataforma pa famia, amigu, fanátiko i simpatisante di Pieter pòst nan último mensahe pa Pieter, ku potrèt i/o video ku eventualmente nan T-shirt bistí. Asina pueblo di Kòrsou na un manera digno i konhuntamente por selebrá bida di Jarzinho Pieter komo hende, tata, frei, ruman, famia, kiper di Vesta i kiper suplente di nos selekshon nashonal.
