Ta pa algun aña caba e discusion aki ta andando, tanto bou di gobierno di asignatura berde como tambe e dos ultimonan di color geel. Pero awo cu Corte di Casacion ta den tuma su decision y Parlamento mester yama reunion publico, mayoria den comunidad a expresa di ta contra legalisa matrimonio di e mesun sexo. Esaki den un encuesta online riba e plataforma di noticia di 24ora.com.
Un total di 3433 persona a participa den e encuesta. Di e cantidad aki, un total di 2252 a expresa di ta contra matrimonio di mesun sexo mientras cu 1181 ta na fabor. Mester menciona cu den tur encuesta haci den e ultimo añanan, semper e cantidad di votadonan contra a resalta. Ta bon pa Parlamento di Aruba realisa so, cu den cuadro di democracia, no por subestima e grupo aki.
Politicamente e fraccionnan di RAIZ, ACCION 21 y MAS a expresa publicamente caba di ta na fabor di e ley. Pero ey ta solamente cinco voto. Ta pronostica cu cinco di e nuebe votonan di MEP ta contra. Esnan contra den MEP ta Hendrik Tevreden, Marco Berlis, Darlaine Guedez-Erasmus, Ricky Hoek y Alvin Molina. Esunnan cu ta parce na fabor di matrimonio di e mesun sexo ta Shailiny Tromp-Lee, Setty Christiaans, Arthur Vallejo y Edgard Vrolijk. Den e fraccion di AVP tin dos miembro contra, Mike Eman y Arthur Dowers mientras cu Mike de Meza, Benny Sevinger y Mervin Wyatt no tin problema pa legalisa mateimonio di e mesun sexo. Ainda tin dos voto, esta di Gerlien Croes cu ta mustra di ta na fabor y Rycond Santos cu probablemente ta contra.
E ora e score por bira e ora:
Na fabor: Contra:
Raiz – 2 MEP – 5
Accion21 – 1 AVP – 2
MAS – 2 R. Santos – 1
MEP – 4 Total: 8 contra
AVP – 3
G. Croes – 1
Total: 13 na fabor
Ta bon pa enfatisa cu ningun voto no ta sigur tanten cu e 21 miembronan di parlamento no vota durante e reunion publico den sala di parlamento. Te e dia ey ainda nan por cambia di opinion y vota sea na fabor of contra e ley. Te cu awo, tur cos ta mustra cu e ley lo pasa den Parlamento di Aruba.
Si no bin cambio, Parlamento lo atende e ley aki den un reunion publico dia 6 di mei 2024. E dia ey cada parlamentario lo mester mustra nan “true colors”. Hopi ta teme cu nan voto lo ppr influencia nan votonan durante e siguiente eleccion, programa pa juni 2025.
Pero cuanto balor e voto lo tin, no ta conoci, pasobra pa fin di mei proximo Corte di Casacion na Hulanda a keda di tuma un decision riba e protesta di Gabinete Wever-Croes II (forma pa MEP y Raiz) a entama contra sentencia di Hof di december 2023, den cual a duna Fundacion Orguyoso y dos hende muhe mas rason cu a expresa cu e ley ta discriminatorio. Den caso cu Corte di Casacion declara e sentencia di Hof como corecto, e ora Gobierno ta obliga di cambia e ley y haci cu pareha di e mesun sexo por casa na Aruba mes y cu tur derecho mescos cu un pareha di sexo opuesto.
Si analisa e encuesta publico cu e posibel votonan pendiente den Parlamento di Aruba, anto ta obvio cu tin un desconexion entre loke e politico kier y loke e pueblo ta desea. Y ora cu ta asina, por spera consecuencia politico, specialmente pa e dos forsanan mas grandi den politica di nos pais, esta e partidonan MEP y AVP cu tin cu atende cu sentimiento di nan “achterban” cu mayoria bes ta adultonan mayo.
