Di 19 di Oktober te cu 15 di November 2018 Departamento di Labor y Investigacion (DAO) lo tene su di ocho Encuesta di Forsa Laboral (EFL 2018).
E EFL 2018 lo tuma lugar den cooperacion cu e Oficina Central di Estadistica (CBS) como tambe di Banco Central di Aruba. E EFL 2018 tin como meta, forma un imagen actual y completo di e mercado laboral di Aruba. Un meta importante di e EFL 2018 ta e midimento di e cifra di desempleo pa Aruba. Pa medio di e informacion recogi tambe lo determina otro caracteristicanan y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di e trahadornan.
E datonan y e tendencianan señala lo sirbi esnan cu ta stipula maneho, gobernantenan, investigadornan, y empresarionan con pa nan mehora y rafina nan maneho pa cu e mercado laboral.
Con bo persona por yuda?
Pa e EFL 2018 a scoge un muestra (sample) di 2000 adresnan reparti riba henter Aruba. Si bo adres a cay den e adresnan scogi, nos ta pidi’bo cordialmente pa duna bo colaboracion na nos encuestador. Den e encuesta aki lo entrevista solamente esnan di 15 aña bay ariba, y pa esaki no ta importa si e persona ta traha of no. Pa medio di e cuestionario bo lo contesta algun pregunta riba bo situacion actual riba e mercado laboral.
E encuestadornan lo bishita e adresnan selecta di dialuna pa diadomingo entre 08.00 a.m. y 08.00 p.m.. E encuestadornan lo identifica nan mes cu un badge special di DAO y nan lo bisti un t-shirt cora cu nos logo. Den caso cu no tin ningun hende na cas, e encuestador lo laga un carta atras cu su number di telefon. Nos ta pidi’bo pa por fabor tuma contacto mas liher posibel cu e encuestador pa traha un cita cune. Tambe bo por yama DAO pa asina traha un cita.
Privacidad
Lo procesa tur informacion anonimamente y publicación lo ta solamente den forma agrega. Bo privacidad ta garantisa pa Departamento di Labor y Investigacion.
Bo informacion lo contribui na mehora e bista riba desaroyonan den e mercado laboral di Aruba. P’esey bo participacion na e EFL 2018 ta essencial.
Nos ta gradici’bo di antemano pa bo participacion na e EFL 2018. Pa mas informacion riba e Encuesta di Forsa Laboral 2018, bo por tuma contacto cu number di telefon 523-7720 y puntra pa un di e trahadornan di e Oficina di Investigacion di Mercado Laboral (Bureau Arbeidsmarktonderzoek).
