E CAO di APA ta bay ta venciendo final di Juli, comienso di Augustus. A manda carta basta tempo pasa pa APA pa asina STA cuminsa renegosha e contracto colectivo. Tabata tin un presentacion di parti di gerencia di APA di e situacion financiero, kico ta nan entradanan, kico ta nan gastonan, kico ta nan perspectivanan y ta algo cu e sindicato a duna mayoria di e miembronan cu a asisti na un reunion cu a tene siman pasa, segun presidente Diego de Cuba, cu e trahadonan di APA, caminda cu a splica nan specificamente tambe, kico ta locual cu APA a presenta na STA.
No obstante di esey APA mes lo tene un reunion cu tur su empleadonan pa trece e mesun informacion aki cu nan a trece dilanti, pa splica nan kico ta e situacion. Tin deseonan parcialmente di e empleadonan cu ta representa, cua ta e cambionan cu nan kier mira den e contracto colectivo nobo y STA lo bay manda un carta tambe pa gerencia di APA pa splica nan esaki ta locual cu ta e deseonan di directiva di sindicato STA, hunto cu e empleadonan pa e proximo contracto colectivo.
De Cuba a agrega cu tin di compronde cu tin un otro sindicato a gana un referendum na Departamento Nautico, no obstante esey STA ta keda cu e mayoria den e compania. Awor aki ta keda na gerencia di APA pa dicidi cu e ta keda negosha y ken cu ken e ta keda negosha. STA no tin problema pa bay sinta negosha e CAO cu APA NV. Pero si e ta bay bira un problema si tin di bay sinta negosha cu dos sindicato na mesa y STA ta prefera pa no haci esey. Si mester, STA lo solicita un referendum pa full e compania atrobe. Esun cu gana e referendum e ora ey, lo mester bay representa e trahadonan y renegosha e contracto colectivo. STA ta cla pa esey. Nan no tin problema pa esey. Sa cu den ley di referendum tin un buraco cu mester bay analisa y drecha pasobra e ta treciendo confusion vooral den companianan chikito.
E mester bay wordo limita, pasobra ta papiando cu por pidi referendum pa departamento. Si imagina si tin un compania di 50 trahado y tin 4 departamento, bo tin di bay sinta negosha un CAO cu cuater diferente sindicato. Esey ta bira hopi dificil. Ta un compania cu cuater contrato colectivo diferente. STA ta compronde e bista di dunado di trabao pa loke ta esaki. Como sindicalista madura, ta mira e problema ey tambe. STA mes ta participa na referendumnan cu ta tuma luga vooral den e sector hotelero. Den e sector aki, ta un entidad mucho mas grandi, unda cu tin 400 pa 500 empleado den hotel y tin departamentonan grandi. Den esey e lo ta factibel. Pero mester bin un cambio e ora ey den e ley di referendum. Den e arbeidsvredebesluit aki mester bin un cambio den dje, pa bay pone e minimo y un maximo cu e compania mester por tin, pa por pidi un referendum departamental. Pasobra si tin un compania chikito cu cuater departamento y cada un departamento kies un sindicato, bo lo haya den problema serio.
Por ehempel na hotelnan tambe por haya e problema aki. Imagina cu na hotel si tin departamento di housekeeping, di e hendenan di mantenimento, F&B, y asina aki por keda menciona diferente departamento cu tin, cada un tin di bay pidi un referendum separa cu diferente sindicato, cu ta para bira un tutu y no ta sali nunca for di dje. STA ta conciente di esey. Nan tin alternativanan cu nan lo trece padilanti pa minister di labor. Den un carta a delinea e problema ey tambe caba y e carta ey a bay pa minister di labor, Glenbert Croes, caminda cu probablemente pa diabierna awo, lo bay discuti riba e punto aki specificamente tocante referendum.
E por bira un situacion fastioso y e por trece problemanan bastante confuso. No pa e sindicato so, pero pa e companianan tambe. Pa loke ta trata APA, STA ta bezig caba cu negociacion y ta kere cu pa comienso di otro siman lo continua cu negociacion.
