E dia tan spera a yega. For di tempran, tur hende, na Aruba y mundo henter tabata pendiente pa e casamento di momento y no pa bisa di aña, claba dilanti di television pa no perde nada nada.
Ta trata di e casamento di prins Henry di Inglatera, miho conoci como Prins Harry, cu e actris Mericano Meghan Markle, den e evento aristocratico mas importante di aña.
E union di e actual dukenan di Sussex, a bira oficial ora cu e arzobispo encarga cu e ceremonia a bisa e palabranan aki:
“Den presencia di Dios y ante e congregacion aki, Henry y Meghan a duna nan consentimento y a haci nan promesanan di matrimonio uno na otro. Nan a declara nan matrimonio door di e union di nan mannan y pa e entrega y recepcion di e renchinan. Por lo tanto mi ta proclama nan como casa.”
Dilanti di famia y amigonan cu a compaña nan den e kapel di Saint George, prins Henry y Meghan Markle a intercambia e promesanan tradicional di matrimonio. Despues, e esposonan a sali for di e kapel y entre ovacionnan nan a sunchi otro.
E ceremonia a cumimsa pa 12’or di merdia, ora local.
For di tres ora prome cu e casamento, e invitadonan a cuminsa yega, entre nan celebridadnan manera Amal y George Clooney, David y Victoria Beckham, Oprah Winfrey y mas, mescos cu miembronan di e famia real y di e aristocracia Britanico.
Reina Elisabeth II a otorga e pareha e titulo di duke y dukesa di Sussex.
E ceremonia a realisa den e kapel di Saint George, den e camponan di e kasteel di Windsor, mas of menos 32 kilometer west di London.
Y su ruta pa altar, compaña di su bruidsjongen y bruidsmeisjesnan, pa despues ta ricibi pa e tata di e bruidegom, prins Charles y su propio prins, Henry.
Windsor ta e kasteel mas habita mas bieu y mas grandi di mundo. Ta e residencia oficial di reina Elisabeth II, kende ta pasa e mayor parti di su finnan di siman eynan.
E kapel tin un capacidad di rond di 800 persona.
Despues di e ceremonia, e recien casanan a ricibi 200 representente di caridad di prins Henry p’afo di e kapel.
Despues nan a bandoina e kasteel di Windsor den un “koets” of na Spaño carruaje, pa un procesion di mas of menos 3 kilometer, biahando riba High Street, atrabes di e ciudad di Windsor, prome cu a regresa e kasteel via e Long Walk.
Tras di e procesion, e pareha y e invitadonan a asisti un recepcion ofreci pa reina Elisabeth I den St. George’s Hall, den e camponan di e kasteel, finalisando e eventonan publico di dia.
