Los for di e echo ku Sekretario di Estado señor Knops a bini ku un proposishon rígido i inakseptabel, ku ta bai kontra di nos leinan vigente, Areglo di Estado i nos Statüt.
Los for di e echo ku e proposishon di señor Knops ta karesé di rèspèt pa nos pais komo partner igual den reino i ku ta bini ku un proposishon asina rígido na momentu ku nos pais ta mas vulnerabel pa motibu di Covid, Rozendal ta enfatisá si ku Gobièrnu di Kòrsou mester duna Parlamento i komunidat klaridat i trese un alternativa real riba loke Hulanda a pone riba mesa pa haña e 3rde tranche.
Rozendal a tuma nota ku tin hopi konfushon den nos komunidat i tin gruponan ku ta probechando di situashon aki. E parlamentario a wak bék riba kon tur kos a kuminsá. Esta, ku na dezèmber 2019, kasonan di Covid-19 a bira konosí den mundu i e tempu ei no a yega Kòrsou ainda.
Tres luna despues riba 13 maart 2020, Kòrsou a bai den un ‘lockdown’ pa kasi 8 siman. Esaki tabata tin su efektonan devastador riba nos ekonomia, bida sosial i entradanan pa Gobièrnu. Nos a haña un situashon finansiero hopi pero hopi mas delikado i penoso ku ya nos tabata tin pa años kaba. Esaki a kondusí ku nos a akudí na Hulanda pa ayudo finansiero.
E promé ‘tranche’ tabata pa kuminsá duna alivio agudo na pueblo. Despues ku Gobièrnu a inisiá ayudo riba propio forsa, a ofresé NOW pa mantené mas ku 18 mil kuponan di trabou. i ayudo finansiero pa esnan ku a pèrdè trabou. Ministerio di SOAW riba propio forsa a duna e Karchi Sosial pa kobradó di onderstant i e promé paketenan di kuminda.
Di dos ‘tranche’ a bini pa sigui ku e trayekto di NOW i otro ayudonan sosial.
Seis luna despues di e lockdown i un ekonomia kibrá, nos a kana yega ku mester un di tres ‘tranche’, pero awor, ku kondishonnan irealístiko imponé dor di Gobièrnu Hulandes.
Riba 3 di ougùstùs 2020, Gobièrnu di Kòrsou ta informá Parlamento di Kòrsou ku nos Promé Minister Ruggenaath a manda un reakshon pa Minister President Rutte, riba e ‘Entidat di Reforma Karibense’ pa hańa di tres ‘tranche’.
Den e karta aki Gobièrnu ta indiká su deseonan resumí den algun punto, entre otro, ku Kòrsou ta kere den un ‘Onderlinge Regeling’ i NO un lei di Konsenso. Mester diskutí i aprobá e Landspakket preferibelmente huntu. Mester enbolbí Parlamento den e proseso bMas atenshon pa invershon den aspektonan sosio-ekonòmiko i separá e ‘liquiditeitssteun’ for di esun pa finansiá e reformanan.
Segun Rozendal, awor aki nos mester ‘move forward’, nos mester brinda perspektiva na pueblo, nos mester tin mas alternativa ku solamente loke Hulanda a pone riba mesa.
P’esei nos a trata un karta di e tres paisnan, Aruba, Kòrsou i Sint Maarten pa yega na un posishon konhunto den kua ta indiká na Hulanda pa duna e 3 paisnan e espasio pa bini ku un posibel alternativa ku loke tin riba mesa aktualmente.
E punto di salida di e karta ku Parlamento a trata ayera ta enserá ku nos por fia plaka sin nesesariamente nos mester bai di akuerdo ku e ‘Entidat di Reforma Karibense’.
Rozendal ta keda enfatisá si ku Gobiernu di Kòrsou tin e responsabilidat pa garantisá ku nos tin un plan alternativo. Esta pa garantisá un kalidat di bida duradero pa pueblo di Kòrsou promé, durante i despues di Covid-19.
Mester traha paralelo na negoshannan i dialogo, ku tin ku sigui ku Hulanda, riba nos mes “plan alternativo”.
Si komo pais nos no ke pa mina nos outonomia, anto nos mester karga nos responsabilidat i mustra ku realmente nos por i presentá e alternativa awor awor.
Rozendal tin konfiansa ku pronto, despues ku Parlamento tambe a ekspresá su mes i tuma posishon al respekto, ku Gobièrnu di Kòrsou lo brinda e klaridat i perspektiva na pueblo di Kòrsou. Mester presentá e alternativa. No por warda mas.
Rozendal a terminá bisando durante e reunion di Parlamento, ku awor aki ta e momentu ku kada un di nos komo siudadano por duna nos aporte, kada un na nos manera. Tur aporte chikí ta bira algu grandi. Grandesa pa Kòrsou i bienestar pa un i tur!
