Riba 11 di yüli 2017 parlamentario Rozendal a manda karta pa Minister di Hustisia den kua e ta hasi pregunta tokante institushon di un asina yamá “Pedowatch”.
E mekanismo aki mester tin komo meta pa evitá ku muchanan ta bira víktima di abusu seksual i tambe pa registrá pedofil òf personanan ku tendensia di pedofilia.
Rozendal a kompronde for di kontestanan di Minister ku, komo ku e lo mester kai bou di Voogdijraad, ku implementashon di esaki a sufri un retraso. Ta konosí ku for di 2016 mester a reorganisá Voogdijraad den dos aña di tempu i pa despues por instituí un “PedoWatch”.
Den e kuadro aki Rozendal a hasi e siguiente preguntanan na minister.
- Minister por bisa Parlamento si e trayekto di reorganisashon di Voogdijraad a terminá?
- Minister tambe ta di opinion ku mirando ku sifranan di abusu di mucha ta oumentando i tambe kasonan di pedofilia ta sosodé mas frekuente, ku mester intituí e “Pedowatch” awor si ku prioridat?
- Minister por bisa Parlamento si entre tantu a kuminsá pa instituí un “PedoWatch”?
- Minister por bisa Parlamento si dado kaso a instituí un “PedoWatch” ainda, ki ora nos por ferwagt esaki sosodé?
- Minister a aloká òf reservá fondonan pa e “PedoWatch” riba presupuesto 2019? Unda nos por mira esaki?
