Elsa Rozendal di MAN: Kiko ta status di introdukshon di un Kinderombudsman pa Kòrsou?

116

Na yüni 2019 Parlamento, durante un komishon sentral, a trata e inisiativa di lei ‘Kinderombudsman’ i a saka un relato pre-eliminar ku a bai pa Gobièrnu. 

Sin embargo Parlamentario Rozendal ta konstatá ku te ku dia di awe no a bini kontesta riba e relato bèk Parlamento pa asina Parlamento por bolbe trata e inisiativa di lei en kuestion. 

E ‘Kinderombudsman’ lo tin e tarea pa salbaguardiá derechinan di mucha den nos pais. Kòrsou tambe a ratifiká e tratado Internashonal di Derechinan di Mucha mas ku 22 aña pasá, komo tal e tin e obligashon pa kumpli kuné. Un di e mekanismonan pa perkurá ku esaki ta sosodé ta un ‘Kinderombudsman’. 

Segun Rozendal, ta imperativo pa aselerá e proseso aki p’asina por yega na aprobashon i institushon di e ‘Kinderombudsman’.  Den e kuadro aki e parlamentario a manda un karta pa minister di Asuntunan General, señor Eugene Ruggenaath pa sa status di e inisiativa di lei di ‘Kinderombudsman’ i pa enfatisá riba importansia pa instituí e ‘Kinderombudsman’ rápidamente.