DIMAS tin atraso di 1.000 permiso: Trahando duro pa saca nan mas lihe posibel

Departamento di Integracion, Maneho y Admision di Stranhero (DIMAS) a habri su portanan solamente pa esunnan cu tin un cita y cu no a hinca nan peticion di permiso online. A brinda e oportunidad p’e hendenan aki yega DIMAS pa introduci nan permiso. Diaranson un grupo di persona a yega e departamento, sea cu no tabatin cita of no a bin cu e meta pa introduci permiso pasobra no tabatin cita, pero a presenta pa otro motibonan. 

Loke DIMAS tin pendiente ta permisonan cu a caba di drenta y mester cana nan caminda, tin permisonan cu ta incompleto y lo notifica e personanan riba esaki. Marilyn Wout, vocero di DIMAS, a bisa cu e hendenan aki lo tin di traha un cita atrobe pa por introduci nan permisonan. Tin peticionnan cu algun problema, a nenga nan y bay den apelacion. Tambe tin peticionnan cu ta cla pa hendenan busca asina cu nan mira esaki riba e website di DIMAS. Aworaki DIMAS tin un retraso di mas o menos 1000 peticion cla, pero ta trahando riba un proyecto con pa yuda e personanan haya e documentonan.

Tambe tin atencion na e personanan cu ta introduciendo permiso pero nan paspoort a caduca. Pa motibo cu frontera ta cera y no por renoba nan paspoort na Aruba, tin atencion pa nan. DIMAS a sinta cu diferente consulado y a yega na un areglo pa esunnan cu paspoort a caduca. Esunnan cu no por biaha pa drecha nan paspoort ta acudi nan consulado y aki lo haya un carta p’e por introduci e proceso di permiso na DIMAS.

Segun Wout, tin persona a ricibi un carta for di DIMAS cu derecho di retributie, esta haya placa bek di deposito of leges. Esunnan cu a haya e carta no mester bay DIMAS pa pidi e placa, pero e proceso ta cana pa nan bay cu e carta y recibonan original na departamento di Finansa di Gobierno situa na Camacuri banda di DIMP. Aki nan tin di mustra nan e carta y haci peticion pa ricibi e placa bek. Pa mas informacion por subi e website www.dimas.aw.