Desde cu AZV a ricibi ordo cu mester baha nan gastonan mensual cu 5 miyon florin, a yega na otro proposicionnan. Un di nan tabata introduccion di un eigen bijdrage y p’esey nos ekipo a subi caya pa puntra opinion di ciudadanonan riba e tema specifico aki. Tin ciudadano cu no ta di acuerdo pa bin cu un eigen bijdrage y ta boga pa AZV busca un otro solucion, mientras otronan ta sugeri pa pone pa un tempo so y despues bay bek na e sistema bieu.
Un ciudadano ta di pensamento cu AZV tin cu hacie un manera cu e como cliente no tin di perde, pasobra e forma con nan kier hacie, e lo perde placa. Awo ta un tempo dificil y e ta kere cu por ta nan por hacie pa un tempo so y despues pone bek manera e tabata. Tur hende mester yuda, pero stipula un fecha pa e caba pasobra Aruba ta den un situacion tiki dificil.
Un otro ciudadano ta di opinion cu e sistema di eigen bijdrage no ta bon. E tin di haber cu no ta tur hende por pag’e. Na e momentonan aki ciudadanonan no por paga 60 florin na un remedi, pasobra tin yiu pa cria y hopi otro cos. AZV mester a hacie di otro manera y no cu pueblo tin di bay paga mas!
Ciudadano ta pidi pa AZV busca un solucion otro caminda y no introduci e eigen bijdrage asina sin mas. E ta pensa cu un hende cu ya caba ta paga cierto suma di placa no por paga e eigen bijdrage, pensa riba esunnan cu ta cobra pensioen di biehes of cu ta cobra salario minimo, nan lo no logra esaki. Mester sondea otro caminda cu por.
AZV a anuncia recientemente cu Gobierno lo introduci eigen bijdrage pa por baha nan gastonan di operacion. Ainda no a aproba e ley, pero ta pronostica cu pa dia 1 di augustus lo kier introducie na pueblo. Parce cu lo mester paga pa un parti di servicio na Dokter di Cas, Specialista y pa remedinan cu cumpra na botica. Aunke cu detayenan ainda no ta conoci pa publico.
