Recientemente e compania di produccion audio-visual Elite Productions a transforma nan oficina y deposito den un localidad di evento mahestral. Tanto parti pafo y tambe paden a wordo transforma pa asina jama bon bini na e diferente clientenan y relacionan di trabou.
E compania ta existi pa 12 aña caba y cada tanto aña ta organisa un evento pa asina duna danki. Recientemente e compania a muda tambe pa nan localidad nobo cu ta uno ultra moderno y espacio. Pa e motibo aki den diferente grupo e invitadonan por a pasa paden y haya un tour di nan oficina y deposito.
Aki miembronan di ekipo a splica un tiki riba e historia pero tambe riba e diferente servicionan cu e compania ta brinda. Parti pafor Elite a duna demonstracion di diferente servicio manera efectonan di luz, huma, candela, video mapping, bubble machines y sparklers. E hit di e anochi tabata e 360 Photobooth. For di ora cu e evento a cuminsa te ora cu e la caba hendenan tabata para den rij pa asina haya un beurt pa por traha un video c uta grababo 360 grado y despues den algun seconde bo ta haye den bo email.
Naturalmente entretenimento no tabata hasi falta unda cu ‘The Band’ cual ta un banda nobo completamente varia a habri e anochi. Despues a sigi cu Party Dude Jason (DJ) y pa asina finalisa cu Buleria. CEO di Elite Productions & Entertainment Aruba Mr. Krish Mahtani tambe a hiba palabra pa asina gradici tur presente pa nan sosten continuo pa e compania cu a sa di crece cada anja. E evento tabata posibel den colaboracion cu Aruba Trading Company, Romar Trading, Brouwerij Balashi, Divino, Excelencia Catering y Perfect Team.
