Awor ku keintura di elekshon ta tras di lomba, e konklushon ku partidonan chiki mester saka, ta e les ku no por sigui mas ku nan ego pa poder I sigui tras di konseheronan di politika antikua ku ta keda tene nan dividi I ta destrui i kibra tur posibel union I asina laga historia sigui ripiti su mes kada biaha di nobo.
E parti ku a resalta I parse tabata determinante tabata e konflikto den partido restruktura Era Nobo ku Sr Nochi Willem ku a demonstra publikamente di ta konsehero determinante di Sr Eric Soleano I su partido ku a resulta den divishon interno I tambe a ninga di uni ku otro partidonan chiki I e partido a sigui detoria I a hanja menos voto ku elekshonan anterior. Awor ta mas kla ku nunka ku mester laga los di konseheronan ku ego I renkor I odio personal ku a domina e arena politiko pa e ultimo dekadanan i ku ke sigui ku politika antikua di divishon I no ke mira union pero ke sigui krea konfushon I no solushon. Manera tur lucha prome ora elekshon yega e lucha mester kibra I wordu dividi den politika partidista pero NKBB si a sa di resisti e atake pa kibre I tey pa sigui lucha pa derechonan di tur habitante di tur kolo di Bonaire.
MPB ku a kampanja pa voto Si den referendum, I a perde esaki mahos, I ta kontra Bonaire, no a hanja sosten di pueblo kompletu pa tin tur asiento manera nan tabata purba forsa I manipula e pueblo Boneriano ku nan lo hanja I laga e pueblo Boneriano kai den trampa I gara kompletu di Hulanda. Mirando bek riba e kampanja di elekshon I tambe tur e foronan I debatenan orkestra pa mesun gruponan elitarionan , ta mesun gruponan ku a sostene UPB pa hinka nos den Hulanda awor a kambia UPB pa MPB. I dimes nan no a spar niun esfuerzo pa purba influensia I forsa tur esnan ku ta kai bao di nan ku nan ta manipula I domina via trabao, fabor o kos pa vota pa nan. I nan a uni mas alew ku e Hulandesnan- Oropeo ku a sigui drenta yena Bonaire ku por vota den 3 luna I ku silensiosamente tur a vota kual nan meta ta pa sigui dividi I destrui tur kos aki na Bonaire I usa MPB pa kaba tuma Bonaire kompletamente over.
Resultado di elekshon 2019 ta demonstra klaramente ku pueblo Boneriano, sumando huntu alrededor di 10.000 votadonan registra, tur suidadanonan Boneriano, no ta kontentu. Esaki ta esnan ku a keda sin vota o a vota pa e partidonan Demokrat I gran parti di UPB nan dos ku a pone referendum di 2015 I a vota No huntu ku e votonan di Era Nobo, Un Union pa Pueblo, Frente Sosial Progresista I Union Revolushonario Boneriano tur ku ta pro-Bonaire, e grupo No ku ta kontra e status illegal aki komo suidadano di 2do rango impone na 10-10-10.
Apesar di tur e miles I miles di dolarnan ku Hulanda via gezaghebber I RCN I tambe intervenshon a-la-gestapo di media Hulandes pa purba boicot NKBB for di prensa, tur pro I na fabor di e status quo awor ke bai hasi un investigashon pa sa dikon e pueblo a protesta I boycott e elekshon. Ta obvio ku no lo investiga dikon e algomerashon pa vota na ultimo momentu. Kaya ta papia I ta bisando ku por aklara esaki fasilmente dor ku pa 7or anochi ta 5500 (38%) hende so a vota e ora ey ku tur e partidonan grandi ku a parse di kumpra “volmacht” mester a kolekta tur “volmacht” ca 1000 na tur I soru pa esnan di konfiansa di partidonan mester a vota 6 biaha. Pues por kalkula fasilmente ku e ora ey un total di kasi 2500 voto pa konseho insular I kiescolege huntu via volmacht por ta un di e motibunan prinsipal.
Henter e isla su liderazgo, supuesto plan di Hulanda pa stop NKBB, I sektor priva bao di direkshon di esnan pro-Hulanda i Kamara di Komersio ku anteriormente a demostra di ta di grupo Si den referendum, a posishona nan mes kontra NKBB pa purba pa kibra NKBB. NKBB a para fuerte kontra henter e armada kolonial aki na Bonaire I no a sukumbi I a sali viktorioso. Awor e lucha ta sigui pa involvi komunidat internashonal I pa logra pone Bonaire bek riba lista di teritorionan-sin-propio-gobernashon I kai bek bao di protekshon di Nashonan Uni. Un yamada ta bai na e pueblo, na kasi e 10000(dies mil) almanan Boneriano ku no ta kontentu I ta di tur e partidonan ku a wordu dividi pa e elekshon pa no perde speransa I ku nos lo supera I lo logra. NKBB lo keda para riba politika di divishon I lo keda mantene e vishon di union. Ta solo pueblo salba e pueblo. Huntu nos lo logra salba Bonaire pa un miho bienestar pa nos yunan I nos futuro generashonan. Bonaire ta di nos I nos stime I nos lo lucha huntu pa salba e Boneriano I su identidat , su kultura, norma I balornan I loke ta hasi nos hende, nos dignidat Boneriano.
