Minister di VVRP, Sra, Zita Jesus-Leito a duna e señal di komienso na ekspertonan den planifikashon lokal i internashonal pa desaroyá un vishon eksperto pa algun área stratégiko na Kòrsou.
Esaki ta un kontinuashon riba seshonnan ku a tuma lugá den 2017den diferente bario. E ekspertonan lo presentá nan vishon i algun posibel proyektonan pa transformashon di Montaña, Barber, i Sentro di Suidat riba djabièrnè 16 di novèmber.
Agènda Urbano Nobo.
E biahe di Kòrsou rumbo pa un Agènda Urbano Nobo a kuminsá na 2016, mesora despues di e konferensha Habitat III na Quito den 2016, kaminda paisnan miembro di Nashonnan Uni a akordá e Agènda Urbano Nobo. Na desèmber 2016, Konseho di Minister di Kòrsou a akordá e strategia di implementashon pa e agènda aki, kompaña pa un mapa di rutanan ku a keda traha na yanüari di 2017.
E agènda urbano nobo mester promové suidatnan i áreanan kaminda hende ta biba ku ta ekologikamente sostenibel, resistente, sosialmente inklusivo, seif, sin violensia, i ekonómikamente produktivo. Urbanisashon ta promové, ora ku atendé kuné korektamente, progreso sosial i ekonómiko, i ta sòru pa un mihó kalidat di bida pa tur hende.
Seshonnan den bario di Montaña, Otrobanda i Bándabou.
Den 2017, Ministerio di Tráfiko, Transporte i Planifikashon Urbano (VVRP) a ehekutá diferente aktividat den kuadro di e agènda urbano nobo, esaki ku sosten di United Nations Office for Project Services (UNOPS). A tene dos workshop di vishon, unu pa henter Kòrsou den Otrobanda, i unu pa área di Bándabou.
Despues a kontinuá ku seshonnan den bario di Montaña, Otrobanda i Bándabou pa validá i risibí komentario adishonal riba e vishon i e metanan ku a keda fórmula. Por ehèmpel sugerensianan konkreto pa drecha transporte públiko, bibienda, i ambiente di biba. E resultadonan aki tabata di gran kontribushon pa e proseso pa yega na un maneho pa Agènda Urbano nobo pa Kòrsou.
Workshop pa planifikashon ku ekspertonan lokal i internashonal.
Henter siman ekspertonan di planifikashon lokal i internashonal ta bin huntu na Kòrsou pa traha un vishon eksperto pa Montaña, Barber i Sentro di Suidat. E ekspertonan ta bai kombersá ku diferente grupo di interes e siman aki i lo bishita diferente bario. E tim di ekspertonan den planifikashon lo wak huntu na aserkamentu inovativo, teniendo kuenta ku resultadonan di e workshopnan tené den bario. E ekspertonan ta presentá nan vishon i algun posibel proyektonan pa transformá Montaña, Barber i Sentro di Suidat.
