Ademas di e team di Aruba cu tabata na Texas pa mira e eclipse solar, tabatin mas Rubiano na Merca cu a disfruta di e fenomeno cu si un persona tin suerte, por mir’e un biaha den su bida.
No tur hende tin e posibilidad di biaha pa e region unda cu e eclipse solar ta visibel. Den e caso aki e tabata na Merca pa cual Rubianonan a biaha pa e pais aki y otronan cu ta biba eynan a busca e miho punto pa mir’e.
Un di nan ta Edward Cheung, un Rubiano cu ta traha cu NASA, kende inicialmente tabata programa pa experencia e fenomeno hunto cu Aruba Space & Nature Foundation y 24ora.com na Texas. Pero debi na e pronostico cu e clima lo ta nubla, e no a tuma e riesgo di perde su chens.
Manera ta conoci di Edward Cheung su trabou ta su hobby y tipo di eventonan asina, hunto cu su casa nan ta subi un aventura pa pasa un experencia inolvidabel. Asina nan a biaha durante un ora y cincuenta minuut pa yega na Newport (VT) como e sitio pa mira e fenomeno natural aki.
E ciudad aki cu ta keda cerca di e frontera Canades, tabatin un shelo hopi cla, ideal. E resultado tabata staciona riba un veld di softball compaña pa un grupo di ciudadano, a experencia e fenomeno inolvidabel.
