Pa: Victor (Toko) Winklaar
Un di e Fiscalnan cu a atende e caso contra dos periodista diamars ultimo relaciona cu ladronicia di radionan di Polis, dado momento den un forma convinencte, a informa Hues cu Ministerio Publico lo hinca man den candela pa un oficial di Polis cu tabata envolvi den e caso aki. Segun e Fiscal, e oficial aki ta un persona “integro”, kende no a presta su mes pa weganan politico, pero cu en realidad hasta e propio Fiscalnan cu a trata e caso aki, no ta sali liber cu un biaha mas, e influencia politico ta grandemente presente.
Un di e hechonan mas curioso, pero sigur impactante den e caso aki, ta den sala di Corte na Oranjestad, e mesun dos Fiscalnan cu tabata envolvi den e caso contra ex Minister Paul Croes, a atende e caso aki y ta mas cu claro cu e tipo di comportacion aki, ta crea e impresion c’un biaha mas Ministerio Publico ta ‘politiek bezig.’ E simbolo di husticia den Reino Hulandes, ta cu ‘Vrouwe Justitie’ ta ciego y ta traha c’un balansa corecto sin cu ta tuma parti pa un of otro partido den cualkier disputa of caso legal den e sistema hudicial.
Sinembargo for di momento c’un Fiscal cu mester ta ‘integro’, mester ta imparcial, e ta sali dilanti y sin mas ta bisa cu e lo hinca man den candela pa un persona, dunando e impresion cu e otronan den e caso aki, esta e dos acusadonan, no ta integro, mientras cu Corte ningun momento a dicta sentencia den e caso aki. Pues te na momento cu Fiscal a haci e declaracion “dom” aki, cu porcierto ta bisa hopi di henter e caso ridiculo aki, no tin ningun hende cu a wordo haya culpabel y ningun momento den e posicion cu e tin, por crea e impresion c’un hende ta integro y e otronan no ta integro.
Di unda a sali un declaracion asina, pero e ta confirma e mentalidad cu Ministerio Publico a bin ta tratando algun caso cu ta ser considera casonan influencia pa politica, ya cu nan tin di haber cu cosnan cu politiconan a crea.
Ta conoci cu Speed Andrade y tambe Marko Espinoza ta hendenan di AVP y a sigui bay nan tras den un tipo di ‘caceria’ hudicial y caminda sin duda Ministerio Publico a permiti su mes di wordo lastra aden y a presta nan mes pa e tipo di cosnan aki. Minister di Husticia, Andin Bikker den declaracion publico a informa cu e lo ordena un investigacion den e caso di uso di radionan di Polis, cu lo a wordo horta pa miembronan di prensa y for di prome dia a punta dede riba e conocido periodista Speed Andrade debi na su forma y estilo di traha pa su medio di comunicacion
Ta bin acerca cu Ministerio Publico a pone comunidad duda den su integridad y su parcialidad ora cu ta cuminsa e caso aki acusando e sospechosonan di “diefstal” pa despues e acusacion wordo cambia pa “verduistering” y awor den e fase final aki ta acusa e hendenan aki di “heling.” Un desaroyo cu ta mustra cu henter e caso aki falta seriedad di parti di Ministerio Publico y cu ta confirma cu realmente ta mustra cu cueste loke cueste tin cu scapa su propio cara den un caso cu simplemente nunca mester a yega Corte. Mesun concepto cu a wordo usa den caso di ex Minister Paul Croes a wordo aplica contra di e dos acusadonan, buscando declaracionnan di hende, buscando un persona cu lo bisa algo cu por duna contenido na un caso ridiculo y cu ta bolbe mustra cu ta dispuesto na gasta miles di florin den un caso cu no ta sirbi interes di ningun hende. Ta papia di 4 pa 5 radio di Polis cu a wordo horta, pero cu ainda no a wordo encontra y riba dje un di e radionan señala como horta, lo ta na Warda di Polis, pues e no a wordo horta.
Un otro punto cu a hala masha atencion t’e exigencia di Ministerio Publico, cu a pidi un castigo condicional di algun luna y cu e miembronan di prensa aki tin cu bay haci mas cu 200 ora di trabou comunitario. Señornan Fiscal y tur cu ta traha na Ministerio Publico, lo ta bon pa realisa cu hopi cu ta traha den medionan di comunicacion y sigur e dos acusadonan, semper a haci trabou comunitario, yudando cantidad di hende for di momento cu nan ta funcionando riba caya te ora cu nan yega bek nan cas. Ta un secreto publico cu Speed Andrade semper a yuda esnan desampara, a duna un man caminda cu e por a duna un man, a brinda sosten den tur forma posibel ora c’un hende na unda cu ta, tabatin mester di esaki. Foei Fiscal, foei Ministerio Publico, un castigo di trabou comunitario lo ta mas un castigo pa boso mes na lugar di e dos miembronan di prensa aki, kendenan ya caba ta activo den comunidad, mientras cu Ministerio Publico ta trata di manipula cosnan den otro pa cumpli c’un decision y peticion politico. Sinembargo ora cu caba di analisa tur loke a wordo presenta den Corte diamars ultimo, tin cu yega n’e conclusion cu Ministerio Publico pa di dos biaha den corto tempo, a haci su mes culpabel na actividadnan politico y a hungando un wega peligroso di usa e sistema hudicial pa mishi cu integridad di hendenan cu bou circunstancianasn normal y legal, no ta culpabel di algo. Ainda por corda con un conocido ciudadano a yega di declara cu den Ministerio Publico, un di e Fiscalnan ta usador di droga. Pa tapa esaki, a manda dicho Fiscal Hulanda. Sigur no ta un Fiscal integro.
