Tin un situacion na refineria caminda cu un cantidad di hende ta wordo pidi pa traha y e resultado ta positivo. Sigur e ta un problema. Den refineria por corda den temporada di Lago, despues e otronan manera Coastal, El Paso, Valero, tur tabata exigi un hende cu ta traha eyden nuchter, sin ningun alcohol den curpa y nan ta test. Una bes bo wordo getest, bo ta p’afo. E ta lamentabel pasobra si bo tin un necesidad pa pone trahadonan local na pia di trabao pa bo reduci bo desempleo y pone placa circula, mehora e calidad di bida, esaki ta causa un problema mas serio, pasobra e oportunidad aki ta bay benta afo. E ta keda si algo cu mester atende na un forma mas completo, mas holistico. Tanto na scol, tanto cu programanan na pia di trabao y tambe e instancianan cu ta traha cu esakinan, mester di e ayudo. Na Aruba awor aki bo no tin por ehempel double trouble, bo tin triple trouble. Bo tin ciudadanonan cu por ta na un nivel halto di cuello blanco, cu kisas ta uza droga. Asina ey e ta keda baha na un nivel caminda cu bo tin hendenan cu problema social, cu problema psicologico, problema di adicion cu ta bira un risico pa sociedad. No por tin un sociedad di e forma eynan. Sigur e inversion den esaki, den e prevencion pa yega asina leu, mester ta grandi y na pia di trabao, mester tin programanan. E dunado di trabao mester tin programa pasobra kico ta pasa si por ehempel ta depende di nos localnan pa duna e miho servicio den e sector turistico, cu nan ta bay wordo poni un banda pa laga otro haci’e. E ora eynan ta bay haci daño na nos producto. Un analisis profundo mester tuma luga y conhuntamente mester atende cu e problema aki, segun Hubert Dirksz.
