UPA, hunto cu sindicato STA tabata tin reunion extraordinario cu mediador di gobierno, sr. Anselmo Pontilius, riba e situacion di e trahadonan di ASTEC.
Dave Franken, presidente di UPA, a splica cu e reunion a bay bon. Mediador a yama un reunion urgente, pasobra e ta mira e preocupacion cu tin riba waf di e barconan cu no ta hayando nan servicio manera debe ser. E reunion riba su mes a bay bon. A papia riba e preocupacionnan cu e trahadonan tin. E ta keda un reunion di informacion. Mediador su status no por bisa cada partido kico pa haci.
Den e reunion aki a trece tur punto di preocupacion. Pa otro siman lo bolbe sinta na mesa pa mira e resultado den esaki.
Lo papia cu miembronan
Franken a agrega cu nan lo yama un reunion cu su miembronan den transcurso di e proximo dianan. A base di e mensahe cu haya bek, lo wak si sinta awe ainda of dialuna, pa informa nan con e reunion cu mediador a bay.
Franken ta haya cu di parti di Astec, nan kier pa e situacion normalisa bek. A splica nan cu di parti di UPA, sigur kier un trankilidad bek riba waf. E cos aki mester unda cu tur hende mester ta contento di e resultado final y no un banda cu no ta keda contento. E problema lo bin bek e ora. Franken a sigui splica cu pa otro siman, lo bolbe papia riba e topico aki. Mediador ta dispuesto pa yega pa intermedia pa yega na un solucion di e problema di waf.
Mas cerca di otro
E puntonan cu ta stroba e negociacion awor aki, ta e aumento y un clausula cu tin di overtime, cu segun Franken, tanto UPA como STA no ta di acuerdo cun’e. ASTEC ta di acuerdo pa modifica e punto aki y una bes cu nan modifica e frasenan, sigur sigur lo ta hopi mas cerca di otro.
Situacion riba waf
Actualmente e trahadonan no ta trahando overtime. Nan ta trahando nan orario normal, cumpliendo manera debe ser.
