Mediador di Gobierno Anselmo Pontilius, a reuni cu sindicatonan UPA y STA, pa loke ta e problema na ASTEC. El a splica cu mediador di gobierno a convoca cu gerencia di ASTEC y STA, na prome instante, como kiera cu STA ta representa mayoria di e trahadonan. Como cu gerencia ta combersa tambe cu e dirigentenan di UPA, a invita tambe UPA pa ayera tardi den reunion. A reuni cu nan separa y a purba di analisa e profundidad di e problema.
Den liñanan grandi a compronde cu no ta solamente e hecho di no a yega ainda na un contracto colectivo nobo ta e problema, sino cu tin mas problema operacional. Por ehempel tin un discusion riba e asunto di overtime, no e cantidad di pago na overtime, pero con esaki ta wordo reparti. Esey ta asunto practico cu mediante un contracto colectivo, no lo bay resolve.
A palabra cu e partidonan, aparte cu nan a discuti e proposicionnan cu posiblemente por yuda sali for di e situacion.
A palabra cu diamars e partidonan ta bin mesa, 3’or di atardi. STA y tambe sigur gerencia di ASTEC, lo reuni, pa discuti e proposicionnan cu a bin ayera riba mesa. Mientras tanto, como mediador di gobierno, lo bay purba traha riba alternativanan cu por ta un posibel solucion.
Presion
A pone presion inclusive pa tur trahado keda cabes friu y entre otro cumpli cu e peticion pa traha overtime. Esey tambe ta discusion si overtime ta obligatorio si of no. Tambe pa tene cuenta cu comercio, comunidad y tur otro. Tin derecho, pero bo tin obligacion tambe. Esey ta hopi importante. A haci e apelacion riba e dirigentenan, tanto di UPA como di STA. Ya nan a demostra loke nan por den protesta. Ban purba di caba e situacion aki na mesa, segun Pontilius.
Cerca di un solucion
Cada partido lo kier mas. Tin un momento cu bo tin cu yega na un acuerdo. No por keda den problema eternamente. No ta bon pa ningun hende. Den e caso aki ta spera cu e proposicionnan cu a wordo intercambia ayera tardi, cada ken tin pa repasa nan internamente y ta spera cu despues di diamars atardi por sali realmente.
Autorenobacion di CAO
Segun Pontilius, tin un ley specifico riba contracto colectivo. Na momento cu bo no yega na un contracto colectivo nobo y e partidonan no a avisa otro. Si a negosha y no yega, ta e contracto colectivo vigente, yam’e bieu, ta esey ta keda extende su mes. Esey no kiermen cu automaticamente por ehempel dos, tres aña pasa, den e contracto colectivo bieu, ta bin na vigor. Esey a wordo proba caba den sentencia di hues. Na e momento aki, importante ta, ta pa purba di yega na un acuerdo nobo. Esey ta e punto cu kier purba di sali for di dje.
E contracto colectivo di trabou CAO
Di acuerdo cu ley di contracto colectivo, e partidonan, si nan no duna aviso cu nan kier negosha uno nobo, e contracto colectivo ta extende su mes un aña cada biaha, maximo cinco aña. Si e partidonan ta negoshando, mientras tanto, loke tin den e yama contracto colectivo bieu of esun cu a vence, esey ta keda aplicabel.
Casonan di empleadonan publico
Mediador di Gobierno ta sigui e casonan di Douane y bao di maestronan di scol, cual ta den un tension. Ora cu e empleadonan publico tin cualkier situacion di conflicto cu nan dunado di trabao, mediador no ta wordo envolvi. Mediador di Gobierno, hopi biaha, e gran parti su tarea ta, pa atende cu e trahadonan den sector priva cu e dunadonan di trabao. Logico e mediador di gobierno como institucion semper por duna conseho na gobierno y si e sindicatonan pidi asistencia. Por ehempel, aña pasa, den e situacion di Douane, a wordo pidi pa bay cerca, pa duna algun conseho.
ASTEC
ASTEC N.V. ta existi desde September 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera. Nan a participa como e unico compania cu tabata interesa den e destaho publico pa diseña, construi, financia, opera y mantene e “Multi Cargo Sea Terminal” nobo situa na Barcadera. Nan a bira asina e “Multi Cargo Sea Terminal Operator” di nos waf di Barcadera.
Sindicato UPA
E sindicato Union Portuario Aruba ta existi desde 19 di october 1960, pues 57 aña. Desde su fundacion, semper UPA a defende interes di trahadonan di waf, exclusivamente esunnan di ASTEC despues cu e compania a lanta. Den pasado a conoce diferente cara conoci cu a dirigi UPA, manera Ruben Hoek y Nadeis Reyes. Awendia Dave Franken ta Presidente di UPA. Despues di mas cu 55 aña nan a perde e poder absoluto riba waf, ora cu Sindicato STA, dor di un referendum, a logra drenta entre trahadonan di waf.
Sindicato STA
Sindicato STA ta existi desde aña 1964 y awendia ta un di e organisacionnan sindical mas grandi riba nos isla, cu algo mas di 1000 miembro activo. E sindicato tabata hopi activo antes na aeropuerto, pero cu tempo a sa di habri su halanan y a bay tras di otro mercado, manera ta HORECA, departamentonan di Gobierno y awor hasta empleadonan riba waf. Diego de Cuba ta Presidente di STA pa e ultimo añanan y a percura pa un crecemento impresionante di miembronan activo afilia na e sindicato.
