Michelle Lont ta voluntario di Poder di Hubentud. Durante entrevista el a splica cu e siman aki ta un siman importante. Ademas dia 14 di Augustus lo culmina cu un evento final. Michelle Lont ta sigui splica cu dia 12 di Augustus ta dia di Hubentud. E proyecto aki ta traha pa hubentud di Aruba. Ta promoviendo lidernan den comunidad. Cu lider kiermen cu no ta solamente lidernan cu por para como politico den futuro, sino lider den tur rango. Den sentido cu tin diferente categoria cu e hobennan a wordo nomina. E por cuminsa di deporte, arte, cultura, voluntario y asina por sigui. Tin hopi otro manera cu nan por a wordo nomina. Den tur e trayectoria aki tabata tin un luna y mey, casi dos luna di casi intense workshop, unda cu nan a haya les di leadership skills. Nan a haya workshop con pa ta lider riba nan mes, etiquette, con pa drecha, con pa bisti, con pa papia dilanti un publico. Tur esaki a brinda na e hobennan aki, cual ta casi 25 hoben. E cursonan aki tambe ta pa crea lider den nos comunidad.
E siman aki ta hopi importante tambe, pasobra entrante 8 y 9 di Augustus nan lo duna nan presentacion di tur loke nan a siña. Nan tin cu conta di nan pasado, presente y kico nan kier pa nan futuro. Tur training cu a wordo duna ta pa nan por presenta den e dianan aki y dia 12 di Augustus, por ta tin un sorpresa pa nan. E dia aki tabata di e anochi final, pero a hal’e pa dia 14 di Augustus, cual lo tuma luga na Ritz Carlton, unda cu lo tin un award night, unda cu lo saca e premionan den cada categoria.
E prome categoria ta di 14 pa 17 aña y e otro categoria ta di 18 pa 24. Esey ta pa e anochi di dia 14 di Augustus, cual lo saca e ganado di dia 8 y 9 cu lo bay presenta.
E candidatonan den Poder di Hubentud lo presenta 15 minuut y a base di nan presentacion lo bay saca e ganado di e Poder di Hubentud. Michelle Lont durante entrevista a splica tambe cu esaki ta di tres edicion caba di e Poder di Hubentud.
E ganado ta escogi entre nan presentacion cu nan ta duna dia 8 y 9 di Augustus, nan ta bay presenta riba escenario, un total di 15 minuut manera ya indica y nan ta bay tin shete hurado cu lo bay dicidi kende lo ta e hoben talentoso y poderoso.
Un historia
Poder pa Hubentud lo bay ta di tres edicion. Ya e tin tres aña andando y tur aña e concepto ta keda mesun cos. E muchanan ta bin, haya nan workshop y e mision y vision ta keda mesun cos. El a cuminsa bao di encargo di Minister Paul Croes y como ATHA, nan a sigui cu e bunita proyecto aki, mirando cu nan ta promoviendo lider y traha lider den nos comunidad.
Satisfecho
Segun Lont, nan ta hopi satisfecho. Aunke cu tabata vakantie grandi, algun mucha a bay vakantie, pero apesar di esaki, nan prestacion mes pa bin e workshop, pa participa, pa siña, tur tabata hopi interesa. No por keha. E muchanan tabata mustra hopi interes den esaki. Ta trata aki di mucha homber y muher, cu por a participa. E total si ta 21 cu a keda te awo, cu ta bay participa y 19 cu a dicidi toch di duna nan presentacion. E presentacion ta hopi intense. 15 minuut ta pidi di nan pa conta nan pasado, presente y kico nan kier den futuro. Hopi di nan a tuma e reto y entrante diamars y diaranson, lo bay wak e resultado, segun Lont.
