E resultado di eleccion parlamentario na Aruba e aña aki ta parce e resultado di eleccion parlamentario na Hulanda di 4 aña pasa. E tempo ey e dos rivalnan grandi a ricibi casi e mesun cantidad di asiento den Parlamento. Locual ningun persona a spera e tempo ey, ta cu e dos rivalnan lo forma un coalicion cu otro.
Sinembargo, despues di eleccion, e partidonan a nombra un Informador y a bay negocia pa forma un gobierno. E negociacionnan aki no tabata manera esunnan cu normalmente ta sosode durante formacion di un coalicion aki na Aruba. Esta cua partido ta haya cua ministerio. Sino, unda ta evalua e programa di gobernacion di cada partido, ta pone nan banda di otro y ta yega na un acuerdo ki partinan ta ehecuta den e periodo di gobernacion.
Aki ta busca e similaridadnan entre e promesanan cu e partidonan a haci, ta evalua esaki contra e posibilidad financiero, y ta negocia un acuerdo cu lo por wordo ehecuta durante un periodo di gobernacion. For di diferente skina ta scuchando e mensahe aki, cu tanto MEP y AVP lo mester bay forma un coalicion.
E pregunta ta si MEP ta cambia e decision cu e lider di MEP Evelyn Wever Croes a trece padilanti despues cu resultado a drenta y si lider di AVP ta dispuesto di reconsidera su decision pa bay den oposicion basa riba e resultado di eleccion of si na final ta eleccion nobo lo tin na Aruba.
