Awe mainta e no tabata sinti su curpa bon. El a opta pa test mesora y keda cas pendiente e resultado. El a bisa di tin dolor di cabes pero ningun otro sintoma. E no ta sinti mucho malo, pero di acuerdo cu protocol interno, a test. Un rato pasa e resultado a sali cu Jacco Vroegop a test positivo pa Covid-19. Cua variante e tin y unda el a pega cu ne, ainda no ta conoci.
Mescos cu tur otro hende, e mester keda cinco dia cas deb isolacion. Mesun regla ta aplicabel pa su famia na cas tambe cu mester bay dem cuarentena durante e dianan aki, pa check si nan ta desaroya sintomia, si acaso nan a contagia tambe cu e virus.
Mientras cu e cantidad di casonan positivo y activo a cuminsa baha, toch ainda tin hende cu ta pega cu e virus, cu mas bien ta parce un griep. Particular na e caso specifico aki ta cu Vroegop no ta kere mucho den e vacuna. Parce cu e mes no a vacuna ainda. No cu e no ta kere aden pero e ta sinti cu vacuna no ta proba ainda y a nota cu den caso di Omicron, e vacuna no a yuda cu nada pasobra mas hende a contagia e biaha aki.
Por corda cu su entrevista den Amigoe no a hacie mucho amigo di gobierno y ni di parti di e Hunta di Supervision di Hospital, specialmente esunnan nombra politicamente pa e gobierno na mando. Pero masha lihe gobierno y e hunta di supervision y e mesun director financiero cu a firma un tipo di mocion di desconfiansa contra e director general…cu Gobierno di Hulanda ta para firme tras di dje. Y comosifuera poco, localmente a haya hopi sosten, cu hasta a traha un hashtag riba red social di #istandwithJacco.
Separa di e director, un porcentahe halto di empleado di Hospital di Aruba a contagia cu Covid den e di cinco ola aki. Y mayoria di nan a contagia pa di dos biaha. Pues mas hende a contagia e biaha aki, compara cu e olanan prome, aunke hopi a vacuna. Tin mas of menos 30% di e personal di Hospital mes NO a vacuna contra Covid-19, pasobra pa un of otro motibo, nan no ta kere aden.
