Parce un guera a cuminsa entre e narcotraficantenan cu ta manda droga pa Aruba. Diabierna a intercepta e boto Thailia cu tabatin varios compartimento yena cu droga. Na e punto di sosten di Wardacosta na Savaneta a logra desmantela y topa cu e droga scondi. A logra confisca un cantidad di 180 kilo di cocaina y 57 kilo di marihuana.
Diabierna mes a detene un homber Arubiano y un homber naci na Venezuela. Tin sospecho di mas hende cu a yega cu e boto pero a disparce na momento cu Wardacosta a yega na altura di e beach banda di West Deck Restaurant.
Nan a bay den un auto color preto cual modelo ta conoci caba pa husticia. E forma con autoridad a yega pa e boto cu e siguridad cu tin droga y bay cu e boto via tera sin mira droga ainda, esey ta nifica cu nan tabatin un informacion clave. E informacion aki probablemente a bin for di Colombia mes.
E boto Thailia a sali for di Aruba. A bay te Colombia caminda a paketa droga den diferente compartimento no visibel. Dos dia prome ainda e tabata na costa di Colombia. E boto a sali pa Aruba y eynan e tip a drenta cu e ta yegando cu droga.
Autoridad a keda atento pa su yegada. Na momento cu Wardacosta a yega banda di Cas di Gobernador ya caba e boto tabata riba trailer. E auto preto a bin prome cu Wardacosta a yega y tabata riba un distancia. E demas hendenan, cu parce a yega den e boto, a subi e auto bay na momento cu e area a bira cayente. E dos hendenan na e boto so a keda y mester a coopera cu instruccion cu personal di Wardacosta tabata duna nan.
Taira di e trailer tabata poco plat y kisas esey ta e motibo cu nan a tarda pa bay ora a yega tera carga cu e droga. Acompaña pa personal di Wardacosta den nan pickup y tambe escolta pa dos pickup di Wardacosta a bay Citgo yena taira y djey pa Mariniers Kazerne.
Ey a topa e droga scondi. E boto aki parce ta for di findishi di Wardacosta mes nan a cumpr’e. E tabata envolvi den otro crimen y awo atrobe. E simpel echo cu a yega riba e boto nifica cu Wardacosta tabata sigur di nan cos.
E departamento di droga di polis tambe ta trahando hunto cu Wardacosta den e caso aki. Nan tin un relacion estrecho cu otro pa bringa contra “baho mundo”. Parce entre e narcotraficantenan mes tin un guera.
Un ta kimando otro ora cu nan sali carga cu droga pa Aruba. Algun tempo pasa ya caba a pasa algo similar y eynan ta e unidad di Wardacosta di Colombia mes a intercepta e boto. E no a logra yega akibanda. Awo si e boto a logra pasa ful un lama malo y na yegada riba tera a haya nan cu Wardacosta riba nan. Kiermen tin un “sapo” cu a kima e buelta di droga aki.
Tur cos ta mustra cu e Departamento di Narcotica lo bay tras di e otronan cu awe ainda aparentemente ta afo. Segun caya ta papia, e guy grandi mes, doño di e droga, ta un local narcotraficante cu ta fugitivo di husticia na Aruba y den exterior. Husticia di Aruba y husticia den exterior ta su tras!
Tur cos ta mustra cu e narcotraficante fugitivo aki ta operando awor for di costa di Colombia.
