Un situacion lamentabel a tuma luga dilanti porta di corte awe mainta na momento cu persona a resulta herida. A pidi presencia di ambulance mirando su situacion delicado.
Esaki a tuma luga den careda di 10:30 am na e trapi dilanti porta di corte. Segun por a compronde na sitio, e persona aki tabata den corte y a haya un noticia cu no tabata muchu bon p’e. Por a ripara cu na momento cu el a sali, su curpa a cuminsa bira zwak y dado momento e curpa a laga bay.
El a sak den otro y cay net na e stupi dilanti e porta di corte. E caida tabata basta fuerte y el a resulta herida. A bin compronde cu e ta un persona cu tin complicacion cu su salud, a pasa den operacion recien di lomba y tin problema cu su pia. Tur esaki hunto, mas ainda e mal noticia den corte, a pone cu el a cay den otro. A pidi presencia di ambulance pa bin mas lihe posibel pa asina bin atende cu ne.
Polis tambe a presenta pa asisti den e situacion. Un rato despues a opta pa transporta e persona pa hospital como cu a compronde cu el aricibi un golpi basta serio na cabes.
