Djarason 6 di yüni 2018 algu históriko a tuma lugá komo ku pa promé bia den historia e ‘Grootste Appel’ di e premio ‘Appeltjes van Oranje’ di ‘Oranje Fonds’ a keda otorgá na un organisashon den reino pafó di Hulanda.
Entre e tres organisashonnan ganado, ‘Excel Arts Academy’ a resultá e ganadó máksimo di prestigioso premio aki ku a keda entregá na dje dor di su ekselensia Reina Maxima den Palasio Noordeinde, Den Haag.
‘Appeltjes van Oranje’ ta konsistí di tres apel, otorgá na 3 organisashon ganadó. No ta tur e apelnan tin e mes tamaño. Entre nan tin ‘De Grootste Appel’ ku ta esun di mas grandi ku ta bai na e organisashon ku a bria mas tantu i ku su trabounan a resaltá mas.
E logro aki ta un onor pa e akademia i tambe algu grandi pa Kòrsou kompletu i e hóbennan di Excel Arts Academy.
Ku gratitut den nan kurason na pueblo di Kòrsou pa e konfiansa ku nan ta risibiendo pa por sigui forma mucha i hóbennan komo artista i personanan ekselente den nos komunidat, e delegashon di “Excel Arts Academy” ta regresá for di Hulanda djabièrnè 8 di yüni 2018. Na Curaçao International Airport nan lo entrega e premio aki den man di e direktora di e akademia Shelomi Doran-Bakhuis.
Henter pueblo di Kòrsou a keda invitá pa risibí e delegashon di hóbennan i pa presensiá e momentu impreshonante aki.
Un pabien ta bai na tur miembro di Excel Arts Academy i partikularmente na su direktora kende a inisiá e akademia aki for di aña 2000 na edat hopi yòn.
