Despues cu e ley ‘Landsverordening Beperking Tabaksproducten’ a keda aproba den parlamento unanimamente na aña 2021, a sigui e proceso di cambio di maneho y capacitacion di e personal cu lo bay supervisa e ley aki den practica.
E personal di Dienst Warenkeuring en Hygienne di Departamento di Salud Publico mester a sigui un Buitengewoon Opsporingsambtenaar Opleiding (BOA) cu recientemente nan a termina. E opleiding aki tabata di gran importancia y necesario pa e empleado cu ta bay controla e ley por traha proces-verbaal (boet) na momento cu haya e localidad of establecimento cu ta viola e ley ‘Landsverordening Beperking Tabaksproducten.’
Cu e ley aproba y e empleadonan capacita ta por supervisa a yega e momento pa e ley ta implementa. Entrante prome di januari 2023 lo cuminsa implementa e ley y lo conta cu un periodo di transicion pa duna usuario di sigaria, comercio y comunidad completo oportunidad pa adapta na e ley nobo. Despues di e periodo di transicion e departamentonan cu lo bay ta encarga cu supervision di e ley lo cuminsa controla su implementacion y por duna sancion (boet) pa incumplimento si ta necesario.
Den e simannan cu ta sigui Departamento di Salud Publico lo sigui informa riba contenido di e ley aki. Cu aprobacion di e ley aki, salud publico ta logra dal un stap grandi den direccion di prevencion y un futuro mas saludabel.
Hala rosea Libremente, Landsverordening Beperking Tabaksproducten ta na vigor.
Pa mas informacion like nan Facebook page Directie Volksgezondheid DVG Aruba, Follow nan riba Instagram directie_volksgezondheid_aruba, subi nan website www.dvg.aw, yama na 5224200 of e-mail nan na [email protected].
