Departamento di Salud Publico a tuma nota di un laboratorio (Laboratorio Familiar NV) ta ofrece e covid-19 anti body test. Na e momento aki DVG ta descurasha comunidad pa haci esaki pa varios motibo. Specialmente pasobra awor tin un sorto di panico pa core test y den e proceso ta capas di haci test robes of cu no ta duna Bo e resultado desea of esun cu DVG ta acepta.
Bo curpa ta produci anti bodies dianan of hasta simannan despues di contacto cu e virus. Esaki nifica cu si recien bo a bin den contacto cu e virus, bo curpa lo no tin suficiente anti bodies ainda y bo resultado lo no ta confiabel.
E cantidad di anti bodies den bo curpa tambe ta wordo influencia pa bo estado di salud general, bo edad, bo nutricion, enfermedad y diferente mas factornan por tin influencia riba e cantidad di anti bodies.
Ta uza anti body test mas bien pa mira si e persona den pasado tabatin e virus. Den un brote manera esun cu Aruba ta pasando den dje na e momento’ki, e test aki no ta adecuado y p’esey no ta wordo conseha.
Pa por maneha un brote mester por señala kendenan tin e virus actualmente y esaki ta posibel solamente cu un POLYMERASE CHAIN REACTION (PCR) TEST cu ta e metodo uza rond mundo pa detecta e particulanan di e virus cu ta presente actualmente den e parti patras di e nanishi y garganta di e persona infecta.
Departamento di Salud Publico ta conseha tur persona cu ta desea di haci test di covid-19 pa acudi na un laboratorio cu ta ofrece PCR TEST of acudi na bo dokter di cas si bo ta presenta sintoma di Covid-19.
