Na redaccion di 24ora.com a drenta varios reclamo riba Departamento di Salud Publico (DVG), cu ta e instancia cu ta introduci metodonan di siguridad y ta controla henter comunidad riba cumplimento di e reglanan conoci awendia como “e normal nobo”. Pero tin biaha nan sa bisa “scucha mi consehonan pero no mira mi actonan” cu ta aplicabel con DVG ta brinda servicio na comunidad den e normal nobo.
Companianan, barnan, restaurant y supermercadonan a haya menasa di cera nan completamente, mientras cu concierto y deporte ainda ta plat pa via di protocolnan cu no ta cla of decision cu Aruba ainda no ta cla pa distanciamento social, awe usuarionan cu a bay busca servicio na DVG a topa cu un situacion cu, si no a saca potret, ningun hende lo kere!
Ciudadano a manda nos redaccion un potret y ta bisa cu ta un ironia pa mira con DVG mes no ta cumpli cu regla di distanciamento social pa aglomeracion y ni tampoco ta cumpli cu borchi y sticker na vloer pa indica e distancia cu mester tene na momento di bishita e departamento. Tambe no ta mira un empleado cu ta cana rond pa sigura cu tur esunnan den e fila di para eyfo den solo cayente, ta atene nan mes na e 1.5 meter di distancia for di otro, cu nan ta laba man cu hand sanitizer na porta, etc. No ta aplica reglanan pa cual ta cera otro establecimientonan cu no cumpli.
Locual cu ta indigna e comunidad mas ta cu e mes un departamento aki ta esun cu ta drenta, controla, conseha y prohibi negoshinan di habri si nan no cumpli cu e reglanan stipula.
Casi diariamente ta nota Sharin Koolman, un di e hefenan di seccion den DVG na television den conferencianan di prensa di Gobierno, cu un tono serio ta zundra tur negoshi cu no ta atene nan mes na regla. E aña aki henter e pagamento y buscamento di number di auto a bay hopi diferente pasobra DVG tin reglanna estricto cu no por para den fila. A hasta laga contribuyentenan, pa prome bez den historia, pasa busca number di auto den estilo “drive thru”, pa evita fila. Pues ta ironico cu esunnan cu mester bay DVG mes ta para pafo, sin ningun medida na su luga di distanciamento social.
Un asunto cu obviamente mester bin na conocemento di Minister Dangui Oduber pa e tene masha cuenta cu e desaroyo aki den su departamento. Claro cu e Minister no tin culpa si e departamentonan no ta duna e ehempel cu comunidad ta spera di nan, pero mester corigi e tendencia aki si. DVG mester ta e ehempel pa tur hende “kijk af” for di dje….pasobra ta nan ta traha regla, nan ta controla e reglanan y awo, nan mes no ta cumpli cu nan mesun reglanan!
