Diabierna a tuma luga un encuentro cu ANATO (Asociación Colombiana de Agencias de Viajes y Turismo). Meta di e ecuentro aki ta pa e comerciantenan cera conoci cu Aruba p’asina por bende Aruba como un destinacion. Durante e encuentro por a conta cu comerciante di Bogota, Cali, Medellin y Cartagena.
Carlos San Martin, presidente di ANATO, a bisa cu nan tin por lo menos un aña ta promove e encuentro cu a tuma luga na Aruba. Nan ta considera Aruba importante mirando cu Aruba semper ta un di e destinacionnan preferi p’e Colombianonan. Carlos San Martin mes ta corda cu el a bishita Aruba pa prome biaha mas o menos 35 aña pasa, djey el a bolbe 15 aña pasa. E ta comenta cu e tempo ey, Aruba tabata e destino preferi den Caribe.
Aruba tin varios cualidad interesante manera:
- Cerca di Colombia, pues tempo di vuelo ta cortico. Aruba ta hopi mas cerca compara cu e isla San Andres.
- E facilidadnan y e actividadnan cu Aruba ta conta cu ne, bo no por hay’e otro caminda.
- Economicamente tin bon competencia di prijs, economia na Colombia ta creciendo
E trabou durante e 12 lunanan tabata pa logra trece e comerciantenan pa conoce Aruba, pa asina nan por traha pakete pa e destinacion.
Encuentro na Aruba
Carlos San Martin a splica cu semper e asociacion ta en busca di beneficio pa e comerciantenan pues asina ta diversifica e destinacionnan cu nan ta ofrece. Mayoria semper ta Sur America, Norte America of Europa. Caribe a conta cu un cambio, segun Carlos San Martin, sea ta na Cancun, Republica Dominicana of Cuba, semper tabata lider.
Cu e administracion nobo di Aruba y cu e esfuerso di Jordan Schlipken Croes, director di ATA Latino America, e idea pa bishita Aruba a bolbe cerca e Colombianonan. Aruba ta competi hopi bon cu demas destinacion den Caribe.
Kico ta spera for di Aruba?
Durante e encuentro tabatin un asistencia grandi di e hotelnan y tour operator. A haci varios cambio di contacto y informacion. Den pasado no tabata e conexionnan, durante nan bishita na Aruba nan a bishita diferente hotel y a cera conoci cu e cambernan.
Beneficio entre ANATO y ATA
E oficina di turismo na Colombia a ofrece ANATO un plan di trabou. ANATO a mira cu mester reactiva e destinacion Aruba. Ademas e asociacion ta bishita diferente parti di Colombia pa duna varios presentacion.
Un encuentro importante
Ronella Croes, CEO di ATA, a expresa cu tipo di encuento manera esun di ANATO ta importante mirando cu ATA ta enfoca riba diversifica e mercadonan for di unda ta ricibi bishitante. Latino America ta representa mas o menos 9%, segun e metanan, di e mercado total di bishitante ricibi. For di e mercado di Latino America, Colombia t’esun di mas grandi. Te cu awo, Colombia a demostra un crecemento di 6%, pues ta moviendo mas lihe di loke ATA mes a anticipa. Na momento cu oportunidad grandi presenta, por mira con ATA y Aruba ta move di un manera mas agresivo den e mercado. Varios di e socionan cu tabata t’ey, no ta bende Aruba actualemente. Cu e encuentro aki a introduci bendedo nobo potencial pa Aruba y reconecta e otronan cu ya caba ta bende Aruba como destinacion.
E aña aki ATA tin como meta pa crece e region di Latino America cu 3%, sinembargo por a mira cu te cu augustus e region completo a crece cu 22%. ATA ta sigui move cu proposito pa crece e mercado aki, considerando diversificacion pero tambe e hotelnan nobo cu ta bin na caminda. ATA su tarea ta keda uno clave den sigura cu e socionan y Aruba ta keda beneficia. Ronella Croes, CEO di ATA, a comenta cu papiando cu varios socio por a mira cu Aruba ta un oportunidad pa bishita un destino di calidad halto.
