Diabierna anochi, pa mas o menos 10:45 pm, un driekiel a subi tera p’asina pone su webonan y traha su neishi. Esaki a sosode den e area di Hadicurari/Moomba. Mas cu claro, e fenomeno aki a hala atencion di varios persona, tanto turista como local. Autoridad a laga cera e area cu lint geel p’asina ningun hende stroba e driekiel den e actividad importante aki. Esunnan presente a laga notifica personal di Turtugaruba. Locual tabata remarcabel ta cu esaki no tabata un sitio usual.
Na sitio a pidi tur hende pa no uza flash ni ningun tipo di luz, ya cu esaki por stroba e proceso y causa cu e driekiel ta bay bek den awa, asina lagando tur e webonan cay y esakinan lo bay perdi. Esaki segun Turtugaruba a informa algun dia pasa den un comunicado. Tambe a pidi e hotel den cercania pa paga e spotlight cendi pa evita cu esaki stroba e animal.
Den e siman cu a caba di pasa Turtugaruba a publica un comunicado den cua a notifica cu e prome neishi di driekiel tabata poni na Arashi y cu tambe tabatin algun den e area di Eagle Beach. Driekiel (mescos mayoria turtuga marino) ta den peliger di extincion rond mundo y mester di nos atencion. Ta pa es motibo ta pidi pa ora tuma nota di un driekiel ta traha neishi y pone su webonan, no acerc’e y lag’e haci esaki den tur trankilidad, tambe ta pidi pa limita movecion y no haci ningun zonido cu por molestia e animal.
