Diasabra atardi alrededor di 6:15pm polis a hay’e ocupa cu motociclistanan iresponsabel den Golfweg, na San Nicolas. Segun informacion, tabatin draaimento y pustamento di brommer den e caya. Polis a logra controla un di e brommernan pero tur cos tabata na ordo. Un rato despues a topa cu nan den Weg Sero Preto, a bolbe para un na e crusada di Weg Rooi Hundo.
Tur cos tabata na ordo tambe. Algun meter leu parce tabatin un fiest’i mucha, den cual a pidi motociclistanan yega eynan pa haci show como regalo pa e mucha cu a haci aña.
Pero polis a para e fiesta mirando e reglanan conoci caba relaciona cu Covid-19.
Mientrastanto a activa mas polis awe nochi riba caya p’asina mantene orden publico. Na Playa a activa full un team riba bicicleta. Por spera accion di parti polis awe nochi pa evita aglomeracion innecesario.
