E no tabatin’e facil e ultimo añanan y su aparicion den publico pocopoco a bay ta bahando, te cu ultimo e no tabata sali mucho mas. Raoul Henriquez a haya un ataca di curason na New York y di e tempo ey a start un lucha constante cu su salud, buscando recuperacion. Pero mientras cu e caminda tabata mustra largo y eterno, awe tardi el a entrega e bataya y a opta pa bay sosega den brasa di Señor. Raoul a bay laga atras su casa Landa Henriquez-Jansen y su yiunan.
Raoul Henriquez ta bin di famia Curiel, pa banda di su mama, cu ta doñonan di Maduro & Curiel’s Bank (MCB) na Corsou, cu na nan turno ta doño di Caribbean Mercantile Bank (CMB) aki na Aruba. Nan ta fundadonan tambe di Aruba Trading, cu despues Raoul a cumpra completamente di su famia pa e mes sigui maneh’e aki na Aruba. Den su añanan e tabatin hopi mas negoshi, propiedadnan, restaurant renombra manera Chez Mathilde, fastfood manera Burger King y asina por sigui menciona.
Aruba ta perde asina un comerciante cu hopi experiencia, conocemento y un trayectoria largo di exito y crecemento. Na su señora Landa, su yiunan, su famia, amigo- y conocinan, su empleadonan y tur cu ta stim’e, ta bay nos palabranan di mas profundo condolencia. Cu Raoul Henriquez sosega na paz.
