E dianan aki atrobe a tuma nota di awa sushi den area turistico cu tin miles di local tambe ta sea labora of bishita. Un biaha mas a mira cu tin un cantidad di awa para y e biaha aki banda di Palm Beach Plaza. Poco dia pasa tabata banda di Riu. Trahadornan no por a yega na nan auto pa bay cas pasobra awa di Riolering a subi caminda y rondona hasta autonan staciona den cercania di RIU. Oranan largo e awa a keda para y autonan tabata pasa aden hiba e problema mas leu ainda. Holo tabata insportable.
Te den marduga DOW a manda personal y despues truck pa chupa e awa. Mientrastanto bacteria den e awa di riolering a spat den henter e area. Awor mesun cos a sosode banda di Palm Beach Plaza den dia. Yamadanan tabata drenta pasobra no por haya un solucion pa un cantidad di awa di pos cu a sali for di e riolering. Autonan tabata pasa spat awa y tur rond e holor y situacion vies. DOW atrobe a tarda pa bin drecha e problema cu tabata un situacion hopi desagradable. A yega ora pa DOW traha mas responsabel pa no causa un problema cu higiena unda miles di hende ta frecuenta diariamente.
